US in Ukraine hnenah ‘cluster Bomb’

US thawhpui ram hrang hrang te chuan Wshington in Ukraine hnena bomb hlauhawm ‘cluster bomb’ pek a tumah nuam tihlohna an nei lian hle.
Karkalta Zirtawpni khan US chuan khawvel titi siamin Ukraine hnenah ralthuam sawi hlawh cluster bomb a pek tur thu sawiin President Joe Biden chuan ‘thutlukna siam harsa tak’ tiin a sawi.
UK, Canada leh Spain te chuan hetiang ralthuam hman hi an duh loh thu an sawi nghal a ni.
Cluster bomb te hi civilian te tana a hlauhawm em avangin khawvel ram 100 te chuan an khap mek a ni.
Cluster bomb hian bomb te reuh te te keng tel \euhin chu chuan hmun zau tak awh theiin a huam chhung a zau thei em em a ni.
Hei mai bakah hian cluster bomb te hi a hlawhchham duh hle a, bomb puak lova awm chu hun rei tak kum tam tak leiah inphumin chumi hnuah beisei loh hunah a puak leh thei \hin a ni.
Biden chuan CNN tena Zirtawpni kaltaa interview an neihah thutlukna siam hmain thawhpui ram te a rawn lawk thu sawiin cluster bomb Ukraine hnena pek chu US in \anpuina $800 million military aid package a pek zinga tel tiin a sawi.
US National Security Adviser Jake Sullivan pawhin American cluster bomb te Ukraine hnena thawn te chu Russia in he indonaa a hman mek te aiin a hlawhchham tlem zawk tiin a sawi bawk.
US thutlukna hi human rights group te chuan sawisel nghalin, Amnesty International te chuan cluster munition chu ‘civilian te nunna atan indona tawp hnuah pawha hlauhawm zui zel a ni’ tiin a sawi.
US thutlukna siam chungchangah UK Prime MKinister Rishi Sunak chuan UK chu Convention on Cluster Munitions ram 123 hming ziah hnantu zingah telin he ralthuam hlauhawm siamchhuah leh hman duh lo an nih thu a sawi a.
Spain Defence Minister Margarita Robles chuan reporter te hnenah an ram chuan ralthuam \henkhat chu hman remlo leh Ukraine a thawnluh rem lova ngaih an nei tiin a sawi.
“Cluster bomb hi kan duh lo va, mahse, Ukraine humhim chu kan duh a, chu chu cluster bomb tel lova kalpui theihah kan ngai” tiin a sawi.
Canadian sorkar chuan cluster bomb in nghawng hlauhawm a neih chu an hlauhthawn a nih thu sawiin kum tam tak puak lova awm zui theiin chu chu nakin zela naupang te tana hlauhawm a ni a ti.
Canada chuan cluster bomb hlan chu an duh loh bur thu leh Convention on Cluster Munitions zawmtu an nih thu sawi bawkin, “Convention hnuaia kan thutiam te kenkawh duh kan ni” tiin thuchhuah an siamah a tarlang.
US, Ukraine leh Russia te chu he convention a hming ziaktu an ni ve lo va, Moscow leh Kyiv te hian tun indona an kalpui mekah cluster bomb hi an hmang ve ve tawh thung.
Hetihlai hian treaty a hming ziah hnantu Germany thung chuan cluster bomb chu Ukraine hnenah a pek ve dawn loh thu sawiin, mahse America dinna chu a hriatthiampui thung tiin a sawi.
“Thil chiang tak chu kan \hian US hian he ralthuam pekah hian thutlukna awlsam takin a siam hauh dawn lo” tiin Germany sorkar thupuangtu Steffen Hebestreit chuan a sawi.
Hetihlai hian Ukraine defence minister chuan cluster bomb te chu hmelma te defence line paltlang nan chauha hman an intiam thu sawiin urban area ah hman a nih loh tur thu an sawi ve thung.
Sullivan, US national security adviser chan US cluster bomb te chu a tlawlh theihna 2.5% chauh a nih laiin Russian te ta chu 30-40% a ni a ti a.
Hetihlai hian US Cluster Munition Coalition, international civil society campaign he ralthuam nuaibo a nih theih nana hmalatu zinga tel te chuan he ralthuam hian ‘kum sawm tam hnuah tawrhna nasa tak a la thlen thei’ tiin an duh loh thu an sawi bawk.
UN human rights office pawhin thuchhuah siamin “Hetiang ralthuam hlauhawm hi khawi hmunah mah hman ni lovin tihtawp nghal vek ni se” tiin a sawi.
Russia defence ministry thupuangtu chuan US thutlukna siam chu ‘mangan thiltih’ tia sawiin Ukraine counter-offensive tia uar taka tlangaupui hlawhchham zia lanna” tiin a sawi.
Russia foreign ministry thupuangtu Maria Zakharova chuan Ukraine in cluster munition chu mawhphurhna la chunga a hman chauh tur thu a sawi leh tiam chu awmze nei lo a ti bawk.
Russian President Vladimir Putin chuan a hma pawhin US leh a thurualpui te chu Ukraine a proxy war kalpuiah a puh a. Ukraine counter-offensive chu thla kalta khan \an tawh niin eastern Donetsk leh south-eastern Zaporizhzhia region ah inbeihna nasa taka kalpui mek reng a ni.
Karkalta khan Ukraine military commander-in-chief Valery Zaluzhny chuan an beihletna chu ralthuam an ngah tawk lohin a tibahlah tia sawiin Khawthlang ram te chu ralthuam pek an intiam te pe muang lutukah a puh bawk.