US-in Willow project a kalpui dodal nasa

US President Joe Biden chuan environmental activists tena an duh loh em em Alsaka-a gas drilling project liantham taka kalpuina tur chu a pawmpui ta a.
Willow Project tia sawi hi ConocoPhillips company te chuan kalpui dawnin tualchhungah investment tam tak thlen dawnin hna sang tam tak siam a ni ang tiin an sawi a.
Mahse, $8 billion project hian duhlotu ngah hle in a bik takinin online lamah dodalna a nasa hle a, thalai lam ten TikTok lamah an bei nasa hle a.
A sawiseltute chuan he project hian climate leh wildlife nasa takin a nghawng chhe dawn tiin an sawi a.
Alaska hmun kilkhawr tak North Slope a kalpui tur niin helai region-a oil tamna ber niin nikhatah oil barrel 180,000 vel lai siak chhuah theihna tur a ni.
US Bureau of Land Management te chuan oil siakchhuah hian kum 30 chhungin Co2e chu 278 million metric tonnes vel a pechhuak thei dawn tia sawiin chu chu US kawngpuia kum khata car maktaduai hnih tlanbelhtir ziahin a pekchhuah emission nena inhen vel a ni.
CO2e hi greenhouse gases tena carbon dioxide an pekchhuah avanga climate nghawng a neih dan tehna unit a ni a.
A hma lawkin Biden administration chuan anti-Willow activists te tilawm turin Alaska leh Artic Ocean oil leh gas drilling 16 million acres hu vel siakchhuah thinnaah bituk a siam thung.
Environemtalist te chuan Willow chu President Biden an climate action a intiamna a neih nana inmil lo tiin an sawisel a.
White House hnenah Willow hnawltura ngenna lehkhathawn maktaduai khat chuang thehluh tawh niin Change.org in Willow titawp tura signature lakkhawm chuan maktaduai thum a hawlh tawh bawk.
“Thutlukna dik lo ani a, ramsa, ram, community leh kan climate tana chhiatna tur a ni,” tiin environmetal charity Sierra Club te chuan an sawi a.
Sonny Ahk, Alaska chhuak Inuipat activist leh Willow duh lova campaign beitu chuan ‘tun atanga kum 30 chhung Artic oil leh gas siakchhuah chuan Artic hmun danga oil siakchhuah tumna a thlen zel ang’ tiin a sawi a.
“State executive ten hlawkna nasa tak an neih laiin tualchhung mi te chu oil leh gas siakchhuah avanga nghawng a neih chhe tak te lawm taka pawm mai tura kalsan an ni dawn a ni,” tiin a sawi.
Mahse Alaska aiawha Congress a awm lawmaker pathum te chua he project hi kalpui turin remtihna an pe vek thung a, Alaska community te hamthatna atana ngai tiin an sawi a. Domestic energy production tipungin chu chuan US in foreign oil a innghahna a neih a tinep ang tiin an sawi.
“Alaska leh kan ram tan thutlukna dik a ni” tiin ConocoPhillips CEO Ryan Lance chuan a sawi thung a.
US energy giant, Alaska a crude oil producer lian ber ni sa chuan energy security tichakin, union job tam zawk siamin Alaska Native community te tan hamthatna thlen tur a ni, tiin a sawi bawk.