South African Beth Naele, kum 40, leh Canadian Miles Cloutier, kum 33, te chuan Valentine’s Day lawm dan danglam deuh zawka hmangin, Guinness World Record siam nan an hmang a, an record chu tui chhunga in-chuks rei ber record a ni a, minute 4 leh second 6 an in-chuks a, record thar an siam. A hmaa hetiang record siamtu chu kum 13 kaltaa Italian TV show Lo Show dei Record-ah niin, hemi tum hian minute 3 leh second 24 in-chuks thei ten record an siam a, he record hi Beth leh Miles te hian an rawn khum ta a ni.
Beth leh Miles te hi inneih tuma inhual lai mek an ni a, an pahnih hian tui chhung lut mi (divers) niin, South Africa-a cheng an ni a, fanu kum khat leh a chanve mi Neve an nei tawh a, tuna record an siamna hi Maldives-a LUX South Ari Atoll resort a ni.
Record siam tum hian zing dar 7:30-ah an tan a, thawk lak warm-up te an nei a, vawi hnih tui chhungah an han in-chuks chhin vel a, an tihchhinnaah hian minute 3 tuichhungah an inchuks a, chutah record siam tumin a vawi thumnaah an bei ta a ni.
Beth leh Miles hian hetiang record siam hi kum thum vel kalta atanga an lo ngaihtuah tawh niin an sawi a, mahse, han tih tak tak dawn ralah chuan an rin aiin a hautak niin an sawi a, Beth chuan, “Record siam kan tum hma ni thum vel a la awm tihah thaw lo a awm kha ka thei ta tlat lo mai a,” a ti a, Miles chuan, “Record awm sa pawh pha lo vai vai tak kan ni,” a ti ve bawk.
Freedive instructor Beth chuan, “Ka tan pawh chona lian tak a ni, ka zirlaite ka hrilh thin ang kha a tirah chuan keimah ber khan kan ti thei tlat lo mai a,” a ti. Beth hi South African Freedive Champion te pawh tum nga lai lo ni tawh a ni a, South African National Freediving record leh African Continental Records-te pawh a lo siam tawh.
V-Day-ah tui chhunga in-chuks rei record siam
Get real time updates directly on you device, subscribe now.
Next Post