Vangchhia-ah khualzin dawnsawn theihna tur hmunhma duang dawn

Vangchhia-ah khualzin dawnsawn
theihna tur hmunhma duang dawn
Champhai district Vangchhia-a PRASHAD Scheme hnuaia sak tur Development of Basic Amenities lungphum chu Nilaini khan Tourism minister Lalnghinglova Hmar chuan a phum.
Minister chuan Vangchhia khua chu eng dang mahin pawlh dal lo turin a duh tih sawiin, khualzin tu pawh lo kal se, danglam vak tum loin an nihna sa angin lo dawngsawng tawp turin a chah. Khualzinten a khaw mite nunphung an hmu duh thin tih pawh sawiin, an khua awm dan anga awm ve mai kha khualzinte tih thin dan a nih avangin anmahni lo danglam a ngai lo tih a sawi.
Vangchhia-in khualzin an hipna kawngah an khuain an hlawkpui a, riahpui theih tur ngaihtuah a tul tih a sawi a. Chu lam kawngah chuan ngaihtuahna seng tura chahin, Tourism department-in ‘culture based tourism’ kalpui a tum tih a sawi a ni.
Champhai district chu khualzin hipna hmun tha tak a nih avangin nasa zawka khualzin hip zel tura tan lak an tum tih Tourism minister hian a sawi a. Champhaiah thil tih pui lian buatsaih a nihin helam tlangdungah khualzin tam tak an kal theihna tur ruahmanna siam a ni dawn a, chutiang atan chuan Development of Basic Amenities pawh hi ruahman niin, riahchilha tlawh duh tan riahchilh theih turin hma an la anga, a hlawkpui tu ber tur chu Vangchhia an ni dawn tih a sawi a ni..
Development of Basic Amenities hi PRASHAD Scheme hnuaia project niin, ‘Vangchhia Cultural & Heritage Centre’ tia hming vuahin cheng nuai 547.32 hmanga sak tur a ni.