Aizawlah halpuah/ halmawi man

Aizawlah halpuah/ halmawi man
Sawrkarin a khap halpuah leh halmawi lam chi chu Aizawl hmun thumah man a ni tawh a, an thil man hlut zawng hi a vaiin cheng nuai 10 chuang hu a ni.
Krismas leh kumthar vuakvetah Mizoram sawrkar chuan halpuah leh halmawi hal, zawrh leh lakluh a khap a. Aizawlah pawh dan kalha halpuah leh a kaihhnawih zuarte dap hna ngawrh takin kalpui a ni. SP Aizawl District hnuaia Police Station-ten an huamchhung theuha dawr leh sumdawnna hmun bakah courier service-te dan kalha halpuah leh a kaihhnawih thil an zawrh leh zawrh loh enfiah a ni.
Aizawl District Police hmalakna kalzelah November 23 khan Khatla atangin halpuah leh halmawi chi hrang hrang box thum an man a, Lalrinfeli w/o Lalramngaia, College Veng Aizawl kut atanga man a ni. November 25 khan P&Sons building Dawrpui atangin halpuah leh halmawi thahnem tak man a ni a, kudam luahtu Sahidul Alam s/o Kamar Uddin, Karimganj Assam chu man niin, heng mi pahnih lakah hian Aizawl Police Station-ah thubuai ziahluh a ni.
November 25 vek hian Lalthawmmawia s/o Lalrosanga, Chawlhhmun kut atangin halpuah leh halmawi thahnem tak man ni bawkin, Vaivakawn Police Station-ah thubuai ziahluh a ni a. Heng hmun pathuma halpuah leh halmawi man zawng zawng hlutzawng hi Rs. 10,32,571 a ni.