VC term pawhtawi thu ah min khin peih chuan min khing se – Chief minister
Village council term pawhtawi leh pawhsei chu sawrkar thuneihna a ni a, court-a khing duh an awm chuan khing se, sawrkar tan buaina tur a awm lo tih chief minister Lalduhoma chuan a sawi.Ningania ZPM office Lungleia hun a hmannaah Lalduhoma chuan VC inthlan hi 2025 February chawhnu lama neih turin ruahman a ni a, VC term kal mek hi Covid leng vang khan pawhsei a ni tawh a, a tul hunah sawrkar chuan a pawtseiin a pawttawi thei a, chu chu sawrkar thuneihna a ni tih a sawi.
“Tunhma pawhin pawhsei leh pawhtawi alo awm tawh thin a, thuneitute thuneihna a ni. Tunah court-ah kan khing dawn tih thawmte kan hria a, an buai peih chuan min khing se, keini tan buaina tur a awm hran lo,” a ti.
February thlaah session neih a ni deuh ziah thin a, Planning Commission a awm tak loh hnu in session neih hma a ni ta a, Parliament pawhin an nei hma tlangpui a, chuvangin a tlai berah February thla tawp lama session an tan loh chuan an tlai ang tih an hlau a, chu’ngte ngaihtuah chuan Budget Session hmaa inthlan fel kha a pawimawh, tiin chief minister hian a sawi.
VC inthlan a ni anga, sawrkar kum thar, April atangin hna an thawk thei tawh dawn tih sawiin, “Chutianga hunbi pawimawh bik a nih avang chuan sawrkar kum thar kha a hluiten an kai khan thil buaithlak a awm thei thin a, hetiang ruahmanna hi siam a ni ta a ni. VC tharah chuan kalphung thara kal tur kan duh dawn a ni,” a ti.
Bana Kaih chungchangah loan lak chi leh a thlawna cheng nuai khat thleng lak theihna – Chief Minister’s Special Pakage a awm tih chief minister hian a sawi a. November thleng dilna hun hawn niin, a diltute hian tuna an hmuh nghal loh pawhin an dilna hi an ring zel thei dawn tih a sawi.
December thla chhung hian CM Special Package bik hi selection neih tum a ni a, sawrkar kum kal mek chhung ami tur chu pilot project anga kalpui a ni anga, nakum leh a kum lehah tam lehzuala kalpui chhoh tum a ni tih a sawi. Tuna pilot project atana thlan turte hi mite entawn tlak leh rintlak an ni dawn tiin, “Sum dinhmun nena inmil turin kalpui a ni anga, department hrang hrangin an thlan theih tur zat pawh siamfel tawh a ni,” a ti.