Tun hnaia Russia rama Wagner te lungawilohna chuan security lamah ngelnghet lo tak a siam tia sawi a ni a. Heng mercenary te helna hian Ukraine indonaah nghawng a neih ngei rin a ni bawk.
-- Advertisement --
Eng vanga pawimawh nge?
A hmasa berin, darkar 24 chhung lekin Wagner te chuan Russian city Rostov-on-Don an thunun vek thei. Hmar lam panin heavily-armed convoy an tir lut a, chu chu Moscow atanga 200km leka hlaa awm niin an kal pahin Russian military aircraft an kap thla zui bawk.
Putin rorelna chona liantham bera ngaih niin Wagner leader Yevgeny Prigozhin-an hel an tum a ni lo a ti chungin hlauhthawnna a siam lian hle a ni.
A awmzia berah chuan Russia hi civil war turu tak chhuak hman lek lekin awm a, pumpelh a ni thei hram tihna a ni a. Russia chu khawvela nuclear warheads lian ber dawttu nei ram a ni bawk.
Pahnihnaah chuan Wagner te chu Ukraine-a Russia military force ah thiltithei ber leh awmze nei ber an ni bawk. Wagner sipaite hi career veteran leh misual lung in tang awmkhawm an ni a, Russia regular army aia hlawh nei sang zawk leh tihphur nasat zawka awm an ni bawk.
Indopui II laia hun rei tak inbeihna thlen fe hnua Stalingrad Russia-in a thuhnuaia a dah hnua indona lama a tawnsan lai ber tih chu kumina Bakhmut khawpui Wagner tena an lak kha a ni bawk.
Putin-an eng nge a tih ang?
President Putin chu rilru mumal lo takin a awm mek tih a ni a. Wagner te an hel a, chutiang a nih chuan nakin zel atan pawh a hlauhawm thei an ni tihna a ni. Chutih rual chiah chuan Kremlin tan Ukraine mai ni lo hmun dangah pawh Wagner te hlutna chu sang tak a ni bawk si a ni.
Syria, Libya leh Africa ram tam takah tirhin an awm tawh a, Wagner te chu khawvel huapa Russian strategic power sawhnghettu niin Kremlin him taka siamtu an nihna a awm bawk si a ni. Tun hnaiteah loh theih lohin Putin chuan Wagner te chu Russia-in a chawm tiin a puang ta lo thei lo thung a.
An helna a tawp hnuah Kremlin chuan Wagner fighters te chuan 1 July thlengin regular army a luh an duh leh duh lohah thutlukna an siam a ngai a ti a. Regular army a luh an duh loh chuan an chenna panin an haw thei ang a, emaw Belarus-ah Prigozhin zawmin an kal thei ang, a ti.
Khawiah nge Prigozhin?
Tunkar hian Prigozhin chuanna ni ngeia ngaih thlawhna chu Belarus capital Minsk ah a tum a. A hnu lawkah Belarus leader Alexander Lukashenko chuan an ramah Prigozhin a awm thu a sawi bawk.
Mahse, a chuanna thlawhna chu Russia ah let lehin St Petersburg ah a tum hnuah Moscow a pan leh tih finfiah a ni.
Khawiah nge Prigozhin chu a awm a, Belarus atangin Wagner operation te chu a enkawl thei dawn em ni tih te chu zawhna lian tak niin chhanna awm mai lo a ni.
Prigozhin chuan hlutna sang tak a la nei tura ngaih a ni a, mahse, Putin chuan civil war tichhuak hman lek lek Prigozhin chu a lakah rinna a nghah leh rin a ni tawh lo thung a. Chumai ni lovin Putin chuan amah phatsantu emaw dotute lakah phuba a lak thin dan chu hriat tlanglawn a ni bawk.
British investigator te chuan KGB officer hlui Alexander Litvinienko leh Sergei Skripal te chu Britain leilungah ngei Moscow tirh agent te chuan tura an hrai thu an sawi a. Chutiang chiah chuan Prigozhin pawhin a dam chhung a inven fimkhur a ngai tawh ang tih a ni.
Wagner fighters te?
Ukraine bikah Wagner fighters te chu an insaseng fel tawh anga ngaih a ni a. Regular Russian army angin a thente chu Ukraine-ah raldo turin an let leh pawh a ni thei a, mahse, Wagner anga an hmalakna chu a tawp tawh.
“Russia chuan indonaa an hmanrua neih that ber leh raldo tha ber ber te chu a tichhia a ni,” tiin Kateryna Stepanenko, Russian analyst, Institute for the Study of War chuan a sawi. “Chu chu Ukrainian fighters te Russian units te beih aia Wagner beihte harsa ti em em te tan chuan chanchin lawmawm a ni,” tiin a sawi bawk.
Engtiangin nge Wagner unit te chu an awm zel dawn a la chiang lo va, Prigozhin, Kremlin leh Lukashenko te chuan inbiakna la nei mek zelin Wagner te hi Belarus a military camp pakhatah an awm khawm mek thung.
Wagner fighter te Kremlin hnuaia intulut tur zat hriat theih a ni lo va, Belarus an zawm zawk ang em tih te pawh zawhna a la ni vek bawk.