WC thengtu New Zealand an chak nghal

July 20 – Nilaini khan hmeichhe World Cup khelh tan a ni a, a thlengtu pakhat zawk New Zealand chuan inlehthalna lian an thlentir a, si khat faiin Norway an hneh. Inkhel dangah Australia chuan si khat faiin Republic of Ireland an hneh bawk.
Inelna thlengtu Newzeland hian Norway lakah tha takin bul an tan a, minute 48-naah Hannah Wilkinson goal thun hmangin hnehna an chang. Norway an hneh hi khawvel huap inelnaah hnehna an chan vawi khatna a ni nghe nghe, an mualah ngei hun chhinchhiahtlak an tawng. Erling Haaland te ram Norway nen Eden Park-a an inkhel hi a hmunah mi 42,137 zetin an en a, hei hi New Zeland-a football khel en an tam ber tum a ni hial bawk. New Zealand hian hun tawp dawnah goal thun belh theihna hun tha an nei a, penalty an hmuh chu Even Ria Percival chuan uiawm takin a hlah thung.
Hmeichhe World Cup hawn nia inkhel dangah Australia chuan an khingpui Republic of Ireland chu minute 52-naah Steph Catley pet goal hmangin an hneh ve bawk.