WED theme: Solutions to plastic pollution

Vawiin hi khawvel pum huapa ‘Environment Day’ niin, United Nations Environment Programme-in a huaihawt atanga a kum 50-na a ni tawh a; kumin thupui atan hian plastic bawlhhlawh tihtawp dan ngaihtuah (solutions to plastic pollution) tih hman a ni. Kumina WED hi Ivory Coast-in Netherland nena inkawpin an thleng a. Ivory Coast hi Africa khawmualpui khawtlang lam ram pakhat, India ang thova developing country niin, kum 2014 atang khan ‘plastic bag hman khapna’ an lo kalpui tawh a ni.
UN-in a zirchiannaah chuan khawvelah hian kum tina plastic siam chhuah zat hi tonne maktaduai 400 vel a ni a, a zatve vel hi hman zawha paih leh mai chi (disposable) a ni. Kum tin 10% vel recycled a nih laiin tonne maktaduai 19-23 vel chu dil, lui leh tuipuiah thehthang a ni a. Chawhrualin kum khatah mi pakhatin plastic lam chi 50,000 vel hmang theuh ang kan ni.
Kumina WED thupui hi khawvelin a mamawh em em mai a ni a, Mizoram pawh hian WED thupui hi kan lak urhsun a ngai tih a lang chiang em em tawh. India pawhin single use plastic item engmeawzat chu hman a lo khap tawh a, mahse a bawhzuina lam a chak fahran lo thin.
Mizoramah pawh plastic hman khap bik lakah dan kenkawh a han ni ve lawp lawp thin a, mahse mar pata dan kenkawh hi a lo har a ni ang, a bultanna lam hi chu a han alh ve hluai a, mahse arbawm chhe hal ang deuhvin a rem leh duak mai thin. Khawpui enkawltu sawrkar AMC pawhin 2019 atang khan Aizawl khawpui huam chhung atan ‘Plastic Free City’ te a han puang ve lawp lawp a, kum nga a han liam a, eng kan ang em em thei lo. Bawlhhlawh thianfaia hnatlang hi a khat mawi tawkin an awm reng a, an bawlhhlawh chhar khawm tam ber (80%?) chu plastic kaihhnawih bawlhhlawh a la ni reng.
Kumina WED thupui ‘Solutions to plastic pollution’ hi Mizoram pawh hian kumin kumtluana kan theme atan hmang chhunzawm thei ila a duhawm hle a ni.