Wine glass chhipchhuan hnem thei record siam

Tui connection kan neih tak fur avangin nula tui chhipchhuan hmuh tur pawh an awm ta mang lo a, tulai nula zingah tui tin chhipchhuan thiam lo pawh kan tam tawh khawp ang. Tih ngai loh na na na chuan thiam loh pawh a awm viau e. Paphos, Cyprus a cheng, Aristotelis Valaoritis, kum 62, chuan wine glass 319 tum khatah a chhipchhuan thei a, Guinness World Record a siam.
A hmaa hetiang record chu Cypriot tho, Ntinos Kkanti-a’n nikuma a siam niin, ani hian wine glass 270 tum khatah a chhipchhuan thei a, he record hi Aristotelis hian a rawn khum chiang hle a ni.
Aristotelis Valaoritis hian hetianga glass tam tak tak chhipchhuan hi 1995 vel atang khan a lo ti tawh thin a, Guinness World Record-ah pawh a mikhual tawh bik lo. Lam chunga wine glass 49 chhipchhuanin record a lo siam tawh bawk a ni.
Tun tuma a record siamna, wine glass 319 hi kg 30 vela rit a ni a, nghawng chak a ngai ve viau ang. A nghawng tichak tur hian a inzir nasa hle reng a ni. Hetiang thiam thilah pawh hian chetsual chang a tam hle a, Aristotelis pawh a chesual ve fo tawh a, wine glass tihtlak keh chuai chang pawh a nei fo niin a sawi.