Women’s World Cup-ah team 48

Women’s World Cup-ah team 48
FIFA chuan kum 2031 Women’s World Cup atanga team 48 an chhuah tawh tur thu nemnghetin, 32 atanga tihpunna hi karliamta Zirtawpni khan virtual meeting kaltlangin FIFA Council chuan a pawm fel ta a ni.
Nakkuma United States, Canada leh Mexico-te inthlentawm tur 2026 Men’s World Cup atangin mipa lam chu a vawikhatna’n team 48 an inlan dawn a, mipa team 32 intihsiak hun chhung chu kum 1998 edition atanga tournament hnuhnungber Qatar rama an khelh kum 2022 thleng kha a ni dawn ta a ni.
Women’s World Cup-ah hian champion lai chu Spain nulate niin, hmeichhe world cup khel tur team 48-a tihpun hun hi mipa lam aiin a fan ta hret a ni.
2027 Women’s World Cup chu Brazil ramah an han nghat phawt ang a, tah hian team 32 an la chhuak rih dawn a ni.
Australia leh New Zealand rama khelh 2023 edition kha hmeichhe team 32 an inlan vawikhatna niin, a hma chiah France rama 2019 tournament-ah khan team 24 an inlan.
FIFA President Gianni Infantino chuan hmeichhe world cup khel tur an tihpun chungchang sawiin, “Hei hi FIFA Women’s World Cup khel tur team 16-a tihpun a ni satliah ngawt lo a, huam zau zawka women’s game-in rahbi thar a tukna zawk a ni.
“FIFA member association tam zawkin an ram theuha women’s football ruangam tihhmasawnna turin he tournament atang hian hamthatna an nei thei dawn a ni,” a ti.
2031 Women’s World Cup thlengtu tur tihfel la ni lo mah se United States chu thlen diltu awmchhun an la nih avangin a vawithumna atan hmeichhe world cup an thleng leh dawn niin a lang ruak a; US hian kum 1999 leh 2003 tournament kha an lo dawl tawh bawk a ni.
United Kingdom pawh 2035 tournament thlen dil awmchhun ni ve mekin, kum 2031 leh 2035 edition thlengtu tur pawh tihfel a la ni lo.