World Bank chief-ah Ajay Banga

Mastercard boss hlui Ajay Banga chu World Bank president atana thlan ni tain low-income ram tena leiba an neih an rulh theihna tur leh climate change beihletna tur chu chona nasa ber a hmachhawn tur nia ngaih a ni.
Banga hi US President Joe Biden chuan he post chelh tura a rawt niin Indian American he bank head ni thei hmasa ber a ni.
Banga hian David Malpass, climate change thlen chhanah mihring te tih nia ngaihnaa zawhna neia sawisel hlawh tak chu a thlak dawn a. Banga hian 2 June ah a hna tanin kum hnih a chelh ang.
US khua leh tui ni tawh Banga hian India-ah bultanin a pa chu army officer a ni a. Nestle leh Citigroup ah thawk phawtin chumi hnuah Mastercard ah lutin kum sawm chuang fe a awm a ni.
US President Joe Biden chuan ‘danglamna siamtu hruaitu’ tia sawiin World Bank enkawl turin tawnhriat a nei a ti bawk a.
“He institution hi khawvelin harsatna hrang hrang a tawh mekah leh retheihna tihhniam leh climate change hmasawn mek zelah tilianin a siam danglam thei ang,” tiin Biden chuan a sawi.
Banga pawmfel a nih hnuah bank’s executive director te chuan thuchhuah siamin lungrual taka thawhpoui an tum thu sawiin ram thanglai mek tena harsatna nasa tak an tawh mek sutkian a nih theih nan hma an lak tur thu an sawi zui a ni.
World Bank-ah hian US chu shareholder lian ber niin he institution hotulu ber tur hi a thlang mai thin a, he bank hian kum tinin ram hrang hrangte hnenah dollar billion tel sum a puktir thin a ni.
Developing ram te chuan US in hotulu ber a ruat papek tawp chu an lo sawi sel tawh thin a, mahse, awmzia a nei vak lo a niang kuminah pawh US ruat Banga bak chuhtu dang an awm lo.
US leh ram hausate chuan bank chu climate change nasa zawka beihna lama thawk turin an duh a. Bank hian climate change doletna lamah kum khatah 100 billion dollar loan a pe chhuak a, mahse, hei hi a tlem tiin a tlem berah 1 trillion dollar tal pechhuak se an duh a ni.
Ram thanglai mekte chuan climate change thlurbing lutuk chuan anti-poverty lama hmalakna a hliahkhuh hlauhna an nei bawk a. Ram thanglai mekte chu pandemic-in a khawih nat em avangin la talbuai mek rengin food price leh energy price te a la sang reng a, leiba an nei kuh tun bawk.
World Bank president a nih angin Banga hian heng harsatnate hi chinfel a tum ngei tur a ni bawk a, chutihrual erawh chuan hmalakna tak tak kalpui turin a dawhkanah sum chuang thehchhuah tur a nei lem lo bawk tia sawi a ni.