Zaninah Jeje thlahliam dawn

Khawvel huapa footballer tha ber berte pawhin a hun hmaa inkhelh an bansan phahna khup hliam damchiang thei lo avangin Mizo Sniper Jeje Lalpekhlua chuan football khelh a chawlh-san thu puangin, zanin dar 8 hian Aijal Club-ah thlahna hun hman a ni dawn a, he farewell prog-ramme hi LPS leh ZONET bakah youtube lamah live-a pekchhuah a ni ang.
Mizote zinga football-a thlengsang ber leh hlawhtling berte zinga mi Jeje thlahna hunah hian MFA honorary secretary Lalnghinglova Hmar chuan thlahna thu leh player chanchin a sawi ang a; AIFF president bakah a international team-mate hlui leh India captain ni bawk Sunil Chhetri, a khelh thinna Indian Super League football team Chennaiyin FC neitu pakhat Abhishek Ba-chchan, chief minister leh sports minister-te’n thlahna leh duhsakna thu an sawite video hmanga pholan a ni ang.
Indian professional football player hmuhnawm ber pawl rawn ni pha Jeje hi 7th January 1991 khan Hnahthialah piangin, centre-forward anga hriat hlawh ni mah se wing lam atang pawhin goal a bawh thei a; Indian national team-a he Mizo right-footed player theihna pho-chhuahsaktu pawimawh hmasa chu India coach hlui Stephen Constantine kha a ni.
A thawhrimna leh insum-theihnate hi a hlawhtlin chhan bulpui zingah telin, a vanglai chho kum 2012 khan ISL Emerging Player of the Season leh FPAI Football Player of the Year atan thlan a ni.
Football tuipui chhungkua atanga seilian niin, a hun hmasa lamah chuan a pa hnungzuiin tlarhnung ven lamah bul a tan a, centre-back leh left-back atangin a pa remruatna angin striker lamah a inlet ta a ni.
Hnahthiala an veng team Model Sporting Club-ah bul tanin, Mizoram Under-19 squad-ah koh a ni a; Goa lama an scout-te mit a la a, rawlthar kum 16 mi lek a nih laiin Red Lizards a zawm a; Under-19 national setup lamah koh niin, a hnuah captain ni chungin India U-19 team chu South Asian Games-ah a chhuahpui a; kum 2008 khan Pune FC a zawm ta a ni.
Senior Indian squad-a a inlan hmasakber chu 21st March 2011 kha niin, AFC Challenge Cup qualification match-ah Chinese Taipei a hmachhawn.
He a debut match-ah hian timna nei loa inlanin India senior team tana a khelh vawikhatnaah goal a khung nghal a; India senior team-a a inlan vawihnihnaah pawh boruak neilian zui lehin, Pakistan lakah goal hnih a tilut.
Rim taka thawkin hma a sawn chho zel a, hliam avanga a chawlh hma lawk thleng khan Indian national football team-ah bultantu nghet a ni chho pha ta hial a, India senior team captain banhren pawh Mizo player zinga hreng hmasaber a ni.
Indian Super League (ISL) lamah Jeje hian ke a nghat chho a, Italian player tha ni thin Marco Materazzi hnuaiah khan Abhishek Bachchan-a team Chennaiyin FC-ah hming a rawn chher.
World Cup winner Materazzi khan Mizo sniper chu a theihna la sawrchhuak tawk loah ngaiin a fuih sauh sauh a, raw talent a nihzia hmuin a hrual a; World Cup final match-a France great Zinedine Zidane-a red card hmuh phahna Materazzi hnuaiah hmuh theihin hma a rawn sawn chho ta reng a ni.
Ball ken leh awmna hmun dik thlan thiam, finishing lam thlengin a hmasawnna hmuh theihin a lang chhuak a; final third lama hmunawl insiam tura khelmual sir tawn tawna ball kapparh dan a thiamnate chuan goal thun kawngah a pui ta hle.
Jeje tih leh number chuan sawizawm a hlawh chho ta zel a, Materazzi hnuaia a khawsak lai khan club leh ram tan senior team ve veah belhkhawmin goal 40 a tilut tling hial a ni.
ISL 2015 a herchhuak a, goal ruk thuna assist vawithum siamchhuakin Indian player zinga goal khung hnem ber a ni a; 2016 edition-ah a goalscoring record tichhahin, assist vawihnih leh goal kua a tilut tling.
2015 SAFF Cup kha ram tana a hmingchherna lian niin, final-a an tumpui Afghanistan-ah hat-trick a siam a; a goal khat chuan an siphurh sutna a thlen a, extra time-ah hnehna changin India a champion-pui.
Tarlan thuak tawh angin, a club career pawh chhiar tham ngial niin, Pune bakah Pailan Arrows, Dempo, Mohun Bagan leh a ropuina Chennaiyin FC tan a thawhhlawk thin.
Kum 2015 khan Chennaiyin tan ISL trophy a hlawhchhuak hial a ni.
Jeje Lalpekhlua hi Joysie Renthlei nen inneiin an fa hmasaber tur an beisei mek a; Hnahthiala an inpui leh Durtlanga a chenna in kartawnin, sumdawnna bakah football academy a buaipui chho a, kumin kum tawp lam inthlanpui lo awm tur atan hian politik nen sawizawm a ni mek!