2025 Billboard Women in Music honoree Jennie, Erykah Badu, aespa, GloRilla, Gracie Abrams, Tyla

2025 Billboard Women in Music honoree Jennie, Erykah Badu, aespa, GloRilla, Gracie Abrams, Tyla
March ni 29-a 2025 Billboard Women in Music event an neih huna an chawimawi tur an puan zinga Jennie, Erykah Badu, aespa, GloRilla, Gracie Abrams, Tyla, Angela Aguilar, Megan Moroney, Meghan Trainor leh Muni Long te an tel. He event hi kum khat chhunga rimawi khawvela hmeichhe che tha te chawimawi nan Billboard-in kumtin an hman thin a ni.
Kumina chawimawi turte hi an inchawhpawlh ve khawp mai a, rawn lar chhuak thar leh hranghlui chan chang ve tan tawh te, pop atanga country, R&B, Latin leh genre dang te pawh an kat nuk mai. Kumin event hi Laverne Cox-i’n a host dawn a, YouTube Theater, Hollywood Park, Inglewood, California-ah neih a ni ang.
Billboard-a Chief Brand Officer Dana Droppo chuan, “2025 Billboard Women in Music-ah hian rimawi hmalam thlak danglam tu, rimawi huanga thil thar tichhuaktu leh midangte fuihphurtu hmeichhe hrang hrang kan chawimawi dawn a ni,” a ti.
aespa hi ‘Group of the Year’ chawimawina hlan an ni dawn a, anni hian a studio album hmasa ber ‘Armageddon- The 1st Album’ support nan global tour an nei mek a, he album hi nikum May thlaa an tlangzarh kha a ni.
Angela Aguilar hi ‘Breakthrough Award’ hlan a ni dawn a, he nula kum 21 mi hian rimawi khawvelah hniak a rawn mawm ve tan a, 2018 khan Primero Soy Mexicana album tlangzarhin, 2021-ah Mexicana Enamorada leh 2024-ah Bolero a tlangzarh tawh bawk.
Erykah Badu hi ‘Icon Award’ hlan a ni dawn a, he zaithiam leh hlaphuah thiam hi Queen of Neo-Soul an tih hial niin, he genre-ah hian artist tam takin a entawn leh a hnung an zui a ni. A hla “Love of My Life (An Ode to Hip Hop)” leh “Bag Lady,” te pawh a lo larpui tawh thin a, Grammy Award panga dawng tawhin Rapsody ‘3:AM’ a feature-na chu best melodic rap performance-ah te pawh an lo thlang tawh hial a ni.
GloRilla hi ‘Powerhouse Award’ hlan a ni dawn a, ani hian nikum October khan a album ‘Glorious’ thlangzarhin Billboard 200 (albums) chart-ah No.5 a kai pha a, a hla ‘Yeah Glo!’ avangin Grammy nomination pahnih a nei thei bawk.
Gracie Abrams hian ‘Songwriter of the Year’ chawimawina a dawng dawn a, he nula kum 25 mi hian a hla hmangin thawnthu ngaihnawm tak a phuah chhuak thiam a, a hla ‘That’s So True’ chu Billboard Hot 100 (singles chart)-ah No.6 a kai thei a, Taylor Swift a feature-na ‘us’ chu Grammy-a best pop duo/group performance-ah nominate a ni tawh bawk.
Jennie hian ‘Global Force Award’ a dawng dawn a, ani hi K-pop hmeichhe group BLACKPINK member niin, a solo album hmasa ber ‘Ruby’ chu nikum March ni 7 khan a tlangzarh a, a hla ‘Love Hangover’ pawh a larpui khawp mai.
Megan Moroney hian ‘Rulebreaker Award’ a dawng dawn a, ani hian nikum khan a album ‘Am I Okay?’ a tlangzarh bakah hla pathum awmna EP Blue Christmas a tichhuak bawk. Moroney hian nikum khan ACM Awards-a new female artist of the year dawngin, CMA Award-ah new artist of the year a dawng bawk.
Muni Long hian ‘Rising Star Award’ a dawng dawn a, ani hian nikum kha lar chhuah kumah a hmang a ni deuh ber a, a hla ‘Made for Me’ chuan Billboard Hot R/BHip-Hop Songs chart-ah No.8 kaiin, Hot 100 chart-ah No.8 a kai bawk.
Tyla-i’n ‘Impact Award’ a dawng dawn a, he South African artist hian ‘Water’ hla avangin Grammy a dawng a, Africaan global music a huhang nei lian tak niin, a hla thar ber ‘Push 2 Start’ chu Billboard Hot 100 chart-ah a lang thei bawk.