2026 WC zawha France manager nihna bansan tur Deschamps

2026 WC zawha France manager nihna bansan tur Deschamps
France World Cup-winning manager Didier Deschamps chuan 2026 World Cup zawh rual hian an ram national team head coach hna a bansan ve tawh dawn tih a nemnghet.
A team enkawl tawh zawng zawng trophy la lakpui zel thei khawpa manager hlawhtling Deschamps hian nakkuma United States, Canada leh Mexico ramte inthlentawm tur Fifa World Cup-ah hian a team enkawl lai a tlinpui leh turah ngai ila, tah chuan a champion-pui emaw champion-pui lo emaw tournament zawh rualin kum 2012 atanga a hna chelh tawh a bansan ve tawh dawn a, France coach ni rei ber a nihna hi khum a har viau tawh mai thei.
Kum 56 mi hian Russia ramin 2018 World Cup a thlen tum khan Les Bleus a champion-pui a; Qatar rama 2022 tournament leh an kawtkaia Euro 2016 an khelh tum khan final thlenpui ve ve bawkin, he mi pahnihah erawh final-ah a naute an chak zo lo ve ve.
Chuti ang mi chuan French broadcaster TF1 hnenah a hna vawn lai a chawlhsan ve tawh tur thu hrilhin, “Kum 2026-ah chuan ka hun a tawp ve tawh ang. Chu chu keimaha a chian dan a ni.
“Level sang bera France khawsakpui duhna leh chakna nen ka hun a tawp ve dawn ta a; tu pawh hian a tawk ta e tih chin kan neih a ngai a, chu mi zawhah chuan nun dang kan luhchilh a ngai thin. A pawimawh ber chu kum tam tak a lo khawsak tawhna top dinhmuna France dahkirleh hi a ni,” a ti.
France hian 2026 World Cup qualifying campaign an la tan chiah lo a, March thla Nations League quarter-final match pakhata Croatia an hmachhawn zawhah an group awmna tur a chiang chauh dawn a ni.
Football a khelh laia midfielder ropui ni thin Deschamps hi Mario Zagallo leh Franz Beckenbauer tih loha player leh manager ni chunga World Cup champion medal awrh thei awmchhun niin, kum 1998 khan captain ni chungin France a champion-pui a; tarlan tawh thin angin, kum 2018-ah manager ni chungin an ram a champion-pui leh a, captain ni chunga trophy a chawi hnu kum 20 zet hnuah captain ni chungin football-a trophy hlu ber a chawi zui leh ngat a ni.
Euro 2012 quarter-final paltlang zo loa an tlak rualin France FA chuan Laurent Blanc thlaktu atan Deschamps hi an senglut a, a ho hian Brazil rama 2014 World Cup khel turin an tling nghal a, last eight-ah champion zui ta Germany hneh loin an tla.
Kum 2016 khan European Championship an thlen tumin Les Bleus chu final thlenpui mah se final extra time an khelh zawh hnuah Portugal hneh loin an tlawm.
Kum hnih a liam leh meuh chuan Deschamps kuta World Cup trophy luh hun a herchhuak ta nge nge a, Moscow khaw final-a 4-2-a Croatia hnehin France a champion-pui.
Kum 2021-ah Nations League title lakpui lehin, Qatar ramah a team enkawl chu World Cup final thlenpui leh mah se extra time zawh thlengin 3-3 a ni a, penalty petah Argentina an ngam ta lo a ni.
France national team a enkawl hmain Deschamps hian club football lamah coach hna thawk hmasain, team langsar pathum – Monaco, Juventus leh Marseille-te chu a tlem berah trophy pakhat tal a lakpui kim vek a ni.
Football a khelh lai pawhin tualchhung leh international level-ah a hlawhtling ve ve a; trophy lian 14 a lak hman zingah Marseille leh Juventus chu Champions League title lakpui ve vein, Chelsea trophy khawl bawmah FA Cup a chhunglut bawk.
Palian lo tak ni chunga defensive midfielder hmuhnawm ni thin hian France tan pawh game 103 zet khel tlingin, 1998 World Cup leh Euro 2000-ah captain ni ve ve chungin national team a champion-pui thei ngat a ni.