Sawmtea’n Maryland-ah Manipur leh Myanmar zohnathlak te tan charity concert nei dawn

USA-a cham mek Mizo mipa gospel singer hriathlawh berte zing ami Sawmtea Chhangte chuan July ni 16 zan dar 6-9 hian Manipur leh Myanmar-a zohnathlak harsatna tawk, Mizorama raltlan mek te pualin Maryland, USA-ah gospel charity concert a nei dawn a, he concert hi Mizo Society of America leh Chin Association of USA-in an buatsaih tur niin, Chin Baptist Mission Church-ah concert hi neih a ni dawn a, concert atanga an sum hmuh zawng zawng chu Manipur leh Myanmar a zohnahthlak harsatna tawk mekte pualin pek vek a ni dawn a, sum hmuh te chu Central YMA kuta hlan tur niin, CYMA-in a remchan dan angin a tanpuinan a pe chhuak ve leh dawn a ni.
Sawmtea puala concert ni mah se hnam inpumkhatna leh tanrual a hun tih hriain US-a zohnahthlak zaithiam lar dang te pawh he concert-ah hian an inlan dawn a, Joseph Suanlian, Rebecca Fanai, Sabina Fanai, Sui Par Chin te nen an che ho dawn a ni.
Sawmtea chuan, “Hetiang hun kan hmang thei tur hi ka lawm takzet a, Mizoramah charity-in vawi tam tak ka penchhuak tawh a, USA-ah pawh mahni tan ngawta kal ni loin, midangte ka tanpui theihna awmchhun ni a ka hriat leh ka duh em em kan ti hlawhtling thei tur hi ka lawm takzet a ni. Kan unaute tanpui an ngaia, tlanchhe tur kan ni lo, khawi hmun atang pawn kan tih theih ang tawk tih zel hi ka duh ber a ni. Kan thawhchhuah tam leh kan unauten ei tur leh sin tur an neih tam dawn avangin theih tawpin ka tang a ni,” a ti a, “He hun atan hian Mizo mipui, zohnahthlak zawng zawng te in mi tawngtaipuina ka ngen a, Pathian leh in zarah tha taka kan tih theih kan beisei a ni,” a ti bawk.