Ukraine-in Black Sea tuialhthei phurte chawlhna hmun bei

Ukraine-in Black Sea tuialhthei phurte chawlhna hmun bei
Ukrainian drone-in Russia-a Black Sea tuialhthei phur lawng chawlhna hmun pakhat a fuhah kangmei nasa tak a chhuak a, lawng pakhat a chhe bawk.
Kyiv hian Russia-in an indo meknaa a sum hnar pakhat, energy kaihhnawih thil a bei nasa hle a. Tuialhthei thlitfimna hmun, an dah khawlna leh pipeline an bei nasa hle.
Russian leh Ukrainian Telegram news channel-ten video an tihchhuahah chuan zana terminal leh tanker pakhat a kang lai a lang a. A kan hun leh a hmun chiah erawh a hriat mai loh.
Russian thuneitute chuan Pathiannia Black Sea-a oil terminal lian ber zinga mi, Tuapse beihnaah hian ram dang lawng pahnih a chhia a, kangmei a chhuak nasa niin an sawi thung.
“November 2 zana drone hmanga Tuapse lawngchawlhna beihnaah ram dang lawng pahnih a chhia,” tiin Krasnodar region emergency operational headquarters chuan thu a chhuah a ni.
Operational headquarters chuan lawnga thawkte zingah thi an awm lo tih an sawi a, kangmei chhuak pawh thelh theih nghal a ni a; mahse, ‘terminal-a building leh thil pawimawhte a kang chhe nual’ tih an sawi.
Kyiv-a General Staff pawhin thu an chhuahah an sipaiten Tuapse oil refinery an kah fuh thu a puang a. Ukraine-a ram chhung himna enkawltu, SBU thuneitu sang chuan drone pangain oil terminal hi fuhin oil tanker, lawnga hlanna hmanrua leh a bul hnaia lawngchawlhna building a chhia niin a sawi.
He lawngchawlhna hi Tuapse Black Sea oil terminal leh Russia-a biggest oil company lian ber, Rosneft-in an enkawl tuialhthei thlitfimna hmun awmna a ni a. Ukraine hian kuminah thlitfimna hmunte hi drone hmangin vawi tam tak an bei tawh a ni.
Ram danga thawn chhuah tur sawngbawlna atan bika tih, Tuapse plant hian ni khatah tuialhthei barrel 2,40,000 a sawngbawl ziah a. Naphtha, fuel oil, vacuum gasoil leh high-sulphur diesel an siam chhuak thin a. China, Malaysia, Singapore leh Turkey-ah hengte hi an thawn chhuak deuh ber thin.
Russian defence ministry chuan Pathianni khan Ukrainian drone 283 an kap thla tih an sawi ve bawk.
Kyiv chuan drone hmanga Russian energy hmunpui an beih hi Russian-ten power grid an beih chhan letna a nih thu a sawi a. Russia hian Ukraine-a power leh intihlumna atana an hman hmunte an bei nasa a, hei hi Ukraine-a an indo meka thlasik apianga an tih ziah thin a ni.
Ramri hrul, Zaporizhzhia region-a Inrinni zana Russia an chetna avang ringawt pawhin mi 60,000 velin power supply an neih mumal theih loh phah a. Chhim lama Odesa an beihnaah mi pahnih an thi bawk tih Pathianni khan Ukrainian thuneituten an sawi.
Russia-ah hian drone tla keh darh chu Tuapse municipal district-a hmun ngaah hmuh a ni a, chenna in thenkhat tukverh darthlalangte pawh a tichhe nual a. Inhliam erawh an awm hriat a ni lo va, Tuapse railway station pawh a chhe nual niin region sorkarin a sawi.
Inbeihna avang hian Russian thlawhna tumhmunte pawh khar a ni a, hengte hi an ram chhim leh khawthlang lama mi an ni deuh ber tih aviation watchdog Rosaviatsiya chuan Telegram-ah a tar lang.