Aia upa zahna a tlahniam tial tial – Lalchhamdama Ralte

Aia upa zahna a tlahniam tial tial
– Lalchhamdama Ralte
Thangthar zingah aia upa zahna a tlahniam tial tial tih minister Lalchhamdama Ralte chuan a sawi.
Chalfilh Group YMA inkhawmpui vawi 22-na Pehlawn khuaa neih a hmanpuinaah Lalchhandama Ralte chuan thangthar zingah Zonun zemawi – aia upa zahna a tlahniam tial tial tih a sawi a. Zonun zemawi a bo chuan Mizo hnam a boral thei tih hre tur leh mahni awmna apianga hma la nghal turin YMA member-te a chah. Social media-ah hmaichhana sawi duh loh tur thu maksak tak tak a tam sawt hle tih sawiin, social media tawngkamah fimkhur a pawimawh ta hle tih a sawi bawk.
Myanmar leh Bangladesh-a Zohnahthlak harsatna tawkte tan YMA-in kawng hrang hranga hma a lak thu minister hian sawiin, “Zofate inpumkhatna par tir hi hnam dinchhuahna pawimawh tak a ni,” a ti. YMA chu Kristianna nena inphiar zawm tlat a ni, tiin, Kristian nuna thil pawimawh nun dan tha chu inzirtir uar zel turin YMA member-te a sawm a ni.
Chalfilh Group YMA inkhawmpuiah hian Power & Electricity engineer in chief Lalhmingliani Hmar chuan thu a sawi bawk a. Inkhawmpui hi ni hnih chhung hman niin, a ni khatnaah palaiten ro an rel a, a ni hnihna hi vantlang inkhawm leh lengkhawm zai intihsiak nan hman a ni.