An mikhual Leeds United hneh lovin: Manchester United an tlawm

Thawhtan zan khan PEnglish Premier League khelh chhunzawm a ni a. Inkhel awmchhunah Manchester United chu Old Trafford-a an mikhual Leeds United hneh lovin an tlawm. Kum 45 zet hnuah Leeds United chuan Manchester United chu League-ah a vawi khat nan an hneh. United an tlawm vangin EPL-a pahnihna nih tuma inelna boruak a nung thar leh zual.
Old Trafford a lenglut Leeds United hi an huangtau hle a, mualneitu United an ngam hle. Na taka an khingpuite nawr nghalin goal an thun nghal teuh hle a. Si nghak Senne Lammens chet that zarah an him hram. Leeds hian an hun tha neih hmasak hlah bawk mah se an hawihil rei lo hle thung. Fuh zetin an khingpuite an nawr tlang nawn leh a, ding lam sir atanga Aaronson ball siam tha tak chu Noah Okafor chuan hnaite atangin leihrulah a pet goal a, minute ngana lekah hmahruaina goal a thun ta nge nge.
Team lian Manchester United lakah goal an thun hmasak vangin Leeds United an phur tak zet a, inrintawkna sang zawk an neih theih phah bawk. Goal thun belh ngei tumin tan an khawh a, khel tha chhunzawmin an che vel hmuh a nuam thei hle. Goal chhuah hmasa zawk ni bawk mah se United an insiamtha tak tak thei lova, awmze neiin an mikhualte an nawr tlang hleithei meuh lo. United in goal thun tuma tan an khawh laiin Leeds United bawk an che fuh hmasa leh a, darkar chanve an khelh tlin hmain goal an thun belh leh.
Leeds in an nawr a, United tlarhnungin an lama hnawk awm chu an thianfai hleithei tlat lo. A kanga ball a vir kual reng hnuin goal hmahruai thuntu Noah Okafor ke-ah ball a tla fuh leh tlat. Okafor hian fuh zetin a hem pawp a, United defender Leny Yoro-a’n a lo dang pial zeuh bawk nen si nghak Lammens dan hman rual lohin a thlawk goal a, Leeds United in minute 29-naah an goal hnihna thunin, an hmahruaina an tizau.
Si hnih an phurh vangin goal thun mamawh viau mah se United buai a kaltluang a, an insiamtha hleithei lo. Si nghal Lammens ball pek dik tawk loh vangin Leeds in goal an thun belh teuh hle. Si nghak Lammens tan dan rual chang tawh lo mah se defender Lisandro Martinez chuan goal line bul atangin save tha zet mai a nei a, an unfual thui lutuk tur lak atan an team a chhanhim. An mualah ngei rin phak baka talbuai United hian chawlhlawk hmain an si phurh an sut then thei lova, si hnih faia hnufual chungin chawlhlawk an hmang.
Chawlhlawk hnu lamah Leeds United an khel tha chhunzawm a, United an talbuai chhunzawm ve thung. Goal thun mamawh United tan hial thil pawi zawk a thleng a, an defender Lisandro Martinez chu second half tan tirhte, minute 56-na lekah hnawhchhuah a ni. Argentina defender Martinez hian Leeds United forward Dominic Calvert-Lewin samah a pawh vangin hnawhchhuah a ni. Martinez hnawhchhuah a nih dan hian titi a siam tam zui viau a. Manchester United leh England defender Harry Maguire chuan referee thutlukna a hriat tawh zawng zawnga chhe ber, dik lo ber ni hiala a hriat thu a sawi zui nghe nghe.
Si hnih phur chunga tlem zawk an nih leh zel vangin United dinhmun a chhe tak zet tawh a, phum ang hlauh an ni hial tawha ngaih a ni. An dinhmun chhe viau tawh mah se team huaisen an nihzia an lantir nawn leh thung a, 11 an nih laia goal an thun theih loh chu 10 an nih hnuin an thun. Bruno Fernandes ball vawrh luh tha tak chu Casemiro chuan far post-ah tha zeti a tauh goal a, minute 69-naah an si phurh sut then.
Casemiro goal thun hian Red Devils a fuih phur viau a, tlawm pumpelh tumin tan an khawh zui nasa hle. An si phurh sut tum viau mah se goal an chhuah belh teuh viau thung. Calvert-Lewin chuan tauh luh theihna hun remchang zet mai a neih chu uiawm takin a hlah. Goal thun tumin innawr tawn viau mah se goal dang a luh belh thei tawh lova, Leeds United chuan Old Trafford-ah ngei 2-1 in hnehna an chang a, kum 44 chhung zet league-a an hneh theih tawh lo Manchester United hneh nawlhin point thum hlu tak an hmu zui ta a ni.
United an hneh vangin Leeds in him an hnaih leh zual sauh a. 15-naah an la awm mek. An muala tlawm United hian point 55 hmuin pathumna an luah chhunzawm ve thung.