Arsenal an chak nuamsa

London club lian Arsenal chuan season thar atan inbuatsaihnaah an neihnaah Nilai zan khan MLS All-Star an hmachhawn a, singa faiin hnehna an chang. Nuamsa taka MLS All-Star an hneh tum hian Arsenal player thar pahnih Kai Havertz leh Declan Rice te an inlan a, an khel chhe lo dun viau nghe nghe a. Havertz phei chuan a club thar tan goal a thun.t
Audi Field, Washington-a MSL All-Star an hmachhawn tum hian Arsenal in bul an tan tha tawk lova, goal chhuah hmasa zawkah an tang teuh hle. An him hram hnuin goal thun hmasa zawkah an tang hlauh thung. Mawi taka ball an inpek kual hnuin Gabriel Jesus chuan vawi leh pui zetin minute 5-naah a pet goal a, hmahruaina goal a thun.
Goal chhuah hmasa zawka tang MLS All-Star in an mikhualte na takin an nawr let a, Wayne Rooney kaihhruai team hian goal thun theihna hun remchang nei thin bawk mah se, a tawp an khar that theih loh an tuar a, goal an thun thei lo. EPL-a Arsenal lo hmachhawn fo tawh Christian Benteke a che duh hleithei lo.
MLS All-Star in goal an thun theih loh laiin Arsenal in an hun tha neih an chhawr tangkai a, goal thun hmasa zawkah an tang leh. Fuh taka ball an inpek tawn hnuin Leandro Trossard chuan minute 23-naah tawih zetin a pet goal a, an hmahruaina tizau turin an goal hnihna a thun. Gunners in goal hnih an thun hnu hian goal thun tumin an innawr tawn zui viau a, chawlhlawk hmain goal thun thei an awm lo thung a, si hnih faia hmahruai chungin Arsenal in chawlhlawk an hmang.
Chawlhlawk hnu lamah Arsenal in bul an tan tha leh viau a, goal an thun leh thuai. Minute 47-na lekah penalty an hmuh chu Italian midfielder Jorginho chuan awlsawm takin a pet goal a, an goal thumna a thun. Si thum faia hma an hruai hnu lawkah an goal hnihna thuntu Trossard a inhliam a, a khel chhunzawm thei lo. Minute 65-naah British player manto ber ni tura an lak luh Declan Rice chuan mual chhung a lut a, Rice hian a club thar tan a khel tha ngha viau a. Arsenal ti hmuhnawmtu a ni zui ngei dawn tih a rin thiam theih nghal.
Si thuma hmahruai tawh Arsenal hian a tawp an khar tha a, hun tawp dawn hnaihah goal hnih dang an thun belh zui leh. Minute 84-naah khel tha tluang tak Gabriel Martinelli chuan awlsam takin a pet goal a, an goal lina a thun. Martinelli goal thun atanga minute nga hnu lekah Chelsea atanga an lak thar, Arsenal player hlawh hnem ber ni bawk Kai Havertz chuan chiang zetin a pet goal a, an goal ngana thunin a tawp a khar. Cross leh volley competition-ah vawi 14 pet a hlawhchham vek Havertz hian inkhel hmain hun duhawm lo leh phurawm lo tak tawng mah se MLS All-Star lakah goal a thun hlauh a, a club tharah inrintawkna sang zawk a neih phah ngei a rinawm.
Arsenal manager Mikel Arteta chuan German forward Kai Havertz hi attacking midfielder-ah a chhawr a, a chhawr fuh zui viau a rinawm. Gunners hian palian, target man an mamawh a, chu an mamawh chu Havertz hi a nih theih a rinawm a. Bal kanga buai thin Arsenal buaina tibotu ni thei dinhmunah a ding.
Arsenal hian inkhel ngahven hlawh zawk an hmachhawn zui leh dawn a. USA-ah vek hian EPL-a an elpui lian Manchester United nen an inhmachhawn zui leh ang.