Arsenal leh City an inum fal

Pathianni zan khan English Premier League 2023-24 khelh chhunzawm a ni a, Arsenal leh Manchester City ten hnehna an chang a, team hnihte hi champion tumin an inumfal. Arsenal hian London a en elpui lian Tottenham chu harsa takin an hneh a, Manchester City chuan Mimuala an khingpui Nottingham Forrest chu si hnih faiin an hneh ve bawk.
Harsa takin Arsenal an chak
EPL a hmahruai mektu Arsenal chuan London-a an elpui lian Chelsea an sawp hnuin Tottenham Hotspurs an hmachhawn zui leh zat a, fiahna hautak an hmachhawn nawn leh. Kar khat chhunga London derby an hmachhawn nawn lehnaah Gunners hian bul an tan tha viau a, chawlhlawk hmain goal thum ngawt an thun hman. Si thum faia hmahruai chungin chawlhlawk hmang mah se chawlhlawk hnu lamah Tottenham nawr let na tak an dawl zo lova, goal hnih an chhuah. An khingpuiten na taka an nawr vangin an dinhmun derthawng hman viau mah se Arsenal hian harsa takin hnehna an chang thei hram a, point thum hlu tak an hmu.
Tottenham muala lenglut Arsenal hian bul an tan fuh a, minute 15-na lekah goal an thawkchhuak nghal. Minute 15-naah hian corner atanga ball kal chu Spurs player Pierre-Emile Højbjerg chuan an lamah chiang zetin a tauh goal a, Arsenal hmahruaina goal a thunsak. Vanduaithlak taka goal an chhuah hnuin Spurs hian an mikhualte na takin an nawr let nghal a, goal pawh an thun nghal. Micky van de Ven hi VAR hmanga ennawn a nih hnuin offside an lo awm tih hriatchhuah a ni a, hnawl a ni. Tottenham goal hnawl a nih hnuin Arsenal an hlauhawm chhunzawm a, goal pawh an thun leh thuai. Hla tak atanga Kai Havertz ball pek fuh tak dawngtu Bukayo Saka chuan inringtawk taka a khalh rem hnuin minute 27-naah awlsam takin a pet goal a, an goal hnihna a thun.
Si hniha hma an hruai hnuin Arsenal an che fuh nawn leh. Declan Rice corner pet tha tak chu Kai Havertz chuan minute 38-naah chiang zetin a tauh goal a, an goal thumna a thun. Inkhel hmuhnawm tak ni tura ngaihah Arsenal an chungnung ta viau a, si thum fai ngawta hmahruai chungin chawlhlawk an hmang.
Chawlhlawk hmain khel tha viau mah se chawlhlawk hnu lamah Arsenal an chesual thuai a, goal an chhuah vangin an buai zui hle nghe nghe. Minute 64-naah Arsenal si nghal David Raya a chesual a, ho zetin Tottenham player Cristian Romero ball a pe. Argentina defender Romero awlsam zetin a pet goal a, an si phurh a sut then. Romero goal thun vangin Tottenham an phur hle a, na takin an mikhualte an nawr chhunzawm nghal. An elpui lian Arsenal nawr tawm viau mah se goal an thun belh thei lawk lova, hun tawp dawn hnaiah penalty an hmu hlauh thung. Declan Rice penalty chawi chu captain Son Hueng-min chuan minute 87-naah a pet goal a, Gunners nen an inkar a tizim.
Goal hnih an thun hnuin Tottenham hian Arsenal an nawr bet tlat a, goal thun tumin an bei ngawrh hle. Dinhmun derthawng taka ding chungin Arsenal an him hram hram zel a, season kal mekah team lian laka chak thiam Arsenal hian an hmahruaina an humhim thei hram a, Tottenham lakah point thum hlu zet mai an hmu. Tottenham lakah an chak leh tak vangin Arsenal in champion beiseina sang zawk an nei. Khelh hmabak pathum an la neihah Gunners hian hnehna an chang vek a nih pawhin City result in Arsenal champion leh champion loh a hril dawn thung. City hian Arsenal aiin an khel tlem zawk a, Gunners khelh zat an khelh a, an chak vek a nih bawk chuan City hi point hnihin an champion thei dawn a ni.
City pawh an chak
Tottenham mualah Arsenal an chak hnuin champion lai Manchester City chu Nottingham Forrest hmachhawn turin City Ground-ah an lenglut ve thung. Arsenal kal fal tur dang tura chak ngei ngei mamawh City hian mikhual an nihna hmunah si hnih faiin hnehna an chang a, point thum hmuin Arsenal an um zui zel.
Chak mamawh tak chunga Forest hmachhawn City tan hian defender Josko Gvardiol chuan hnai tak atangin a tauh goal a, hmahruaina goal a thun. Gvardiol goal thun hmanga hma an hruai reng hnuin bench atanga lut Erling Haaland chuan minute 71-naah City goal hnihna a thun a, an hmahruaina a tizau. Haaland hi hliam vangin City game hnuhnung pahnihah a inlan thei lova, Nottingham Forrest an hmachhawn tum pawhin bench-ah a thu hmasa zet a, mual chhung a luh hnuin goal a thun ta thung. Haaland goal thun hnu hian goal dang a luh belh thei tawh lova, champion lai City in si hnih faiin hnehna an chang ta a ni.
Nottingham Forrest lakah an chak leh tak vangin City hian khelh 34 atangin point 79 an hmu a, pahnihnaah an awm mek. An chung chiaha awm Arsenal ai hian vawi khatin an khel tlem zawk thung a, champion turin an dinhmun a la tha vengvawng hle.