Ivanka Trump-i’n a pa sorkar tharah eng dinhmun mah chelh a tum tawh lo
Ivanka Trump-i’n a pa sorkar tharah eng dinhmun mah chelh a tum tawh lo
Donald Trump-a President hmasaka mi mit fukna, a fanu rangkachak an tih mai Ivanka Trump, kum 43, chuan a pa sorkar tharah chuan eng dinhmun mah chelh a tum tawh loh thu sawiin, “A man a tam em mai,” a ti a, “A man hi ka faten an pek ve zel ka remti tawh lo,” a ti bawk.
Ivanka Trump hi Donald Trump-a President hmasak, 2017-2021 chhung khan a pa tana senior advisor anga awmin, a pa aiawhin hmun hrang hrangah pawh a chhuak vak tam hle a, Donald Trump pawhin a tangkai pui hle a ni.
Ivanka hian a pasal Jared Kushner nen fanu Arabella, kum 13, leh fapa pahnih- Joseph, kum 10 leh Theodore, kum 8, te an nei tawh a, White House-a hnathawh chu a fate bulah hun a hman tam theih loh phah ni a sawiin, “An hun pawimawhah ka awm thei lo ziah a. White House ka chhuahsan hun chuan hetiang hi chu ka van thlen tir dawn tawh lo chiang tak, ka ti thin,” a ti bawk.
Ivanka hian politics a tuipui ve vak lo niin a sawi bawk a, “A khawvel hi a thim ru riau a, chutiang chu in man beh tir ka duh lo. Thim tak a ni, a boruak a tha lo khawp mai,” a ti bawk.
Ivanka hian sorkar thilah a pa thachhang dawl tum tawh lo mah se inthlan hma campaign-na velah chuan a pa hi a tawiawm tha viau tho a ni.