DoNER changtu Union MoS-in
Aspirational District tlawh
Development of North Eastern Region (DoNER) leh Cooperation changtu Union minister of state BL Verma chuan Thawhlehni khan aspirational district – Mamit a tlawh a, sawrkar hotute a kawm bakah kuthnathawktu aiawhte a kawm.
Union MoS hian Mamit district bawrhsap leh department hrang hrang hotute chu district hmasawnna atana tha leh zung an sennaah lawmawm a tih thu a sawi a. Delta ranking-a hmasawnna hmuh tur awmte chu a lawmawm tiin, tan la zel turin a chah.
Sawrkar laipui chuan hmarchhak tan theihtawp a chhuah zel a, Prime minister pawhin tum 50 lai a tlawh tawh tih BL Verma hian sawiin, hei hian hmarchhak hmasawnna atana rilru a sen zia a entir niin a sawi. NE road leh highway tihhmasawn nan sum tam tham tak seng tawhin, sen belh zel tura hma lak a ni, tih a sawi a. Tunhmaa inkalpawhna kawnga harsatna neihte sutkian mek a nih thu te, ministry hrang hrang hotute leh NE-a chief minister-te thawhhona azarah hmasawnna chak taka kalpui a nih thu te a sawi bawk.
Mamit district-in hmasawnna a neih theih nan cooperative societies tha tichak turin a ministry enkawl chuan theihtawp an chhuah tih a sawi a. Harsatna an neihte a hnena thlen hreh lo turin a chah.
Union MoS hnenah hian farmers society hrang hrangten an harsatna lo thlenin minister hian a theih ang anga lo enzui a, hma lakpui a tum thu leh an harsatna ziaka thehlut turin a hrilh.
Aspirational District Programme nodal officer Henry Malsawmtluanga chuan aspirational hnuaia hmalakna leh Delta ranking dinhmun a sawifiah a. Union MoS hi DoNER deputy secretary-in tawiawmin, thutkhawmah hian Mamita department hrang hrang hotute, tlawmngai pawl aiawh leh khawtlang hruaitute bakah thuthar thehdarhtute an tel a ni.
DoNER changtu Union MoS-in Aspirational District tlawh
Get real time updates directly on you device, subscribe now.