Hmeichhe tan meizuk a pawi lehzual

University of Minnesota-a mithiam ten zirchianna an neih tharah hmeichhia ten mei zu tlem zawk mah se mipa aiin meizuk vanga harsatna tawh theihna risk 25% in an nei sang zawk niin an sawi.
Hmeichhia chu pianphung atang renga âwm nêm zawk an ni a, hriselna lama harsatna pawh tawk awlsam niin an sawi. Hmeichhe tana meizuk a hlauhawm lehzualna chu:
Naupai leh meizuk: Nuin mei a zuk chuan a taksa a oxygen a titlem a, hei vang hian nauchhiat theihna risk pawh a sang a, chubakah naupai theihna lohna risk pawh a awm. Naupian fuh lo leh hlamzuih te pawh nuin mei a zuk nasat chuan risk a sang bik niin an sawi bawk.
Meizuk leh naupai theih lohna: Medical expert-te chuan hmeichhe meizu ten naupai theih lohna risk an nei niin an sawi a, hmeichhe meizu ve ngai lo te nena khaikhin phei chuan risk hi 30% in a sang zawk a ni.
Hnute cancer leh meizuk: University of Pittsburg-a Graduate School of Public Health-a mithiam ten hmeichhe 13,388-a zirchianna an neihah hmeichhe meizu te chuan hnute cancer neih theihna risk hi meizu ve ngailo te aiin an nei sang zawk niin an sawi.
Lung natna leh meizuk: University of Minnesota leh Johns Hopkins University-a mithiam ten zirchianna an neihah, hmeichhe meizu te chuan a zu ve lo te aiin 25% in lung natna thihpui theihna risk an nei sang zawk niin an sawi a, mipa meizu te aiin meizuk vanga cancer pawh neih theihna risk pawh a sang zawk niin an sawi.
Meizuk leh natna dang: Meizuk hian thawkna lampang a khawih buai thei a, chuap cancer pawh a thlen thei. Chubakah thisen luang vel pawh tibuaiin ke zâwi te pawh a siam thei. Hmeichhe meizu te tan osteoporosis (ruh mawih/ ruh chak lo) risk pawh a sang bik a, hmeichhe meizu ve lo te aiin an menopause hma zawk niin an sawi bawk.
A nih leh tlem tlema meizuk a pawi tho em? Pawi tho e, nikhata tlawn 1-4 vel zûk pawhin heart attack neih theihna risk a tisang a, lunglam vanga thih theihna risk pawh a tisang niin an sawi.
Heng zirchianna chungchang te hi The Lancet Medical Journal-ah tihchhuah a ni.