Portugal an chak nuamsa

June, 17 Inrinni zan khan Euro 2024 khel tur zawnna UEFA European Championship Qualifying khelh chhunzawm a ni a, Portugal chuan Estádio da Luz-a an mikhual Bosnia Herze-govina chu si thum faiin an sawp a, nuamsa takin hnehna an chang. Awlsam taka Portugal an chak lai hian Belgium an chak zo lova, Scotland lakah Norway an tlawm ve bawk.
Group J-a hmahruaitu ni mek Portugal hian an group-ah palinaa awm mek Bosnia-Herzegovina an mikhual tum hian an khel tha viau a, ball chang tam zawk ni reng mah se goal an thun thei lawk lo thung. Chawlhlawk hmain goal a lut dawn lo emaw tih hnuah Portugal hian hmahruaina goal an thun hram a, hun tawp dawn hnaih lamah Bruno Fernades chuan goal hnih a thun belh ve leh bawk a, an mualah si thum faiin an chak.
Bosnia lakah hian minute 44-naah Manchester City midfielder Bernardo Silva chuan Bruno Fernades siamsak atangin hmahruaina goal a thun a, Silva goal thun hmang hian si khat faia hmahruai chungin chawlhlawk an hmang.
Chawlhlawk hnu lamah Portugal an khel tha chhunzawm viau a, goal erawh an thun belh lawk thei lo. Hun tawp dawn hnaih minutet 77-naah Bruno Fernandes chuan Neves siamsak atangin an goal thumna a thun a. Manchester United midfielder Fernandes hian minute 90+3-ah an goal thumna a thun belh zui leh a, an mualah si thum faiin an chak zui ta a ni.
An mualah an chak leh tak vangin Portugal hian Group J-ah hma an hrua chhunzawm a, vawi thum chak zawn tawhin khelh thum atangin point kua an hmu mek. An hnuai chiaha awm Slovakia chuan khelh thum atangin point 7 an hmu a. Table mawngphah luah mektu Liechtenstein chuan point an la hmu lo thung.
Bosnia an hmachhawn tum hian Portugal captain Cristiano Ronaldo chuan ram tan vawi 199 a khel tling chiah. Ram tan vawi 199 zet a khelh atang hian goal 122 a thun tling tawh a, ram tana goal thun hnem ber a ni mek. Bosnia an hmachhawn tum hian a che chhe lo viau a, chawlhlawk hmaa a tauh loh chu offside vangin hnawl a ni hlauh thung.
Belgium an chak zo lo
Group F-a inkhelah Belgium chuan hmahruaitu Austria lehpelh tumin tan khawh mah se King Baudouin Stadium-ah hnehna an chang zo lova, pahnihnaah an awm chhunzawm a ngaih phah.
Belgium hian an mikhual Austria lakah bul an tan tha lova, minute 21-naah Orel Mangala own-goal hmangin goal an chhuah hmasa. He own-goal vang hian hun rei tak chhung si an phurh a. Si an phurh reng hnuin minute 61-naah Romelu Lukaku chuan goal thunin an si phurh a sut. Hun tawp thlengin goal thun belh thei lo ve ve a, Austria chuan Group F-ah hma an hruai chhunzawm theih phah.
Group F-ah hian khelh thum atanga point 7 hmuin Austria in hma an hruai a. Belgium hian khelh hnih atanga point 4 hmuin pahnihna an ni a. Austria, Belgium leh Sweden te group champion nih tumin an inel zui viau tura ngaih a ni.
Norway an chak lo
Group A-ah palinaa awm mek Norway chuan Inrinni zan khan an group hmahruaitu Scotland an mikhual a, Manchester City goal thun khawl Erling Haaland-a’n goal thun bawk mah se an mualah an chak zo lova, palinaah an awm chhunzawm.
Inkhel hmuhnawm takah hian goal a lut har viau a, darkar khat hnuah goal a lut tan chauh. Minute 61-naah Norway in penalty a hmu a, he penalty hi Erling Haaland-a’n pet goal in hmahruaina goal a thun. Mimualah hnufual zawk an nih hnuin Scotland an khel tha sauh a, goal hnih thunin an chak let ta hial. Scotland tan hian minute 87-naah Lyndon Dykes-a’n goal thunin an si phurh a sut a. Minute 89-naah Kenny McLean-a’n hma an hruai letna goal a thun zui leh nghal a, 2-1 in an chak zui ta a ni.
Euro 2024 khel tur zawnnaah Scotland an khel tha chhunzawm a, vawi thum khel tawhin an la chak vek a, point 9 hmuin hmahruaitu an ni chhunzawm zel. Group champion ni tura rinkai Spain chuan vawi hnih khelin point thum chauh an la hmu a, World champion hlui hi pathumnaah an awm mek.