Hmeichhiate seat hauhsakna BJP vote zawnnaa a kal hlau

Parliament-in Lok Sabha leh State Assembly inthlana hmeichhiate tana seat zaa 33 a hauh sakna chu BJP vote zawnna hmanruaa a kal ral mai mai a hlauhthawn thu PC Party Women Wing adviser Lalrinmawii Fanai chuan a sawi.
PC Women Wing adviser hian thuchah siamin, hmeichhiate dinhmun chawikanna atana Lok Sabha leh State Assembly-a seat zaa 33 tihpunna Parliament Special Session-in a pass – Women’s Reservation Act 2023, India President-in a nemngheh tak chu lawmawm an tih rualin, he Constitution (160th Amendment) Act hi 2024 Lok Sabha inthlanpui atana BJP vote zawnna hmanrua maiah a kal ral palh ang tih an hlauthawng tih a sawi a. He thil hi hlawhtling taka hlenchhuah a nih theih nan, a rang thei ang bera a tak rama chantir turin sawrkar laipui an ngen tih a sawi.
“Union Home minister Amit Shah-a’n delimitation exercise kalpui a tum danah BJP policy pui ber zinga pakhat ‘One Nation, One Election’ tih hi a inphum tel ngei niin a lang a. Hei pawh hi BJP hamthatna ringawt tur ngaihtuah loa, ram leh mipui remchanna thlir chung a, uluk taka ennawn leh turin sawrkar laipui ka ngen a ni,” a ti.
Ram ropui leh hnam changkang apiangin hmeichhiate thiamna leh theihna chu mipate ang bawka ram leh mipui chawikan nana hlutawm a nih zia pawmin, ram roreltu lu ber dinhmun luahtu ah hmeichhiate an awm chho thei ta zel chu a ropui rualin, a bikin Mizo hmeichhiate politics-a inthiarfihlim mai loa, ram leh hnam tana sulsutu nih tuma pen chhuak zel turin a sawm tih Lalrinmawii Fanai hian a sawi bawk.