ICC thutlukna Netanyahu an hua

Israeli Prime Minister Benjamin Netanyahu chuan International Criminal Court in amah leh Hamas leader te chu Gaza buainaa ‘war crime’ kalpuia puha man tumna a neih avangin thinrim takin a dem thu a sawi.
Netanyahu chuan ICC thiltih dan chu a hnawl bur thu sawiin ‘democratic Israel’ chu ‘mass murderer’ te nen ang khata ngaihin a awm tiin a sawi.
Netanyahu thusawi chu US President Joe Biden pahwin thlawpin Israel leh Hamas te chu ang khata ngaih chi a ni lo a ti bawk.
Chief ICC prosecutor Karim Khan chuan Netanyahu leh a Defence Minister Yoav Gallant te chuan Gaza ah war crime leh crimes against humanity an kalpui tih a chiang a ni a ti thung a.
ICC chuan Gaza a Hamas leader Yahya Sinwar poawh war crime avangin amah man tuma hmalak tur a ti bawk a.
Israel leh US chu tang dun tlat niin kum 2002 a din ICC ah member an ni lo ve ve bawk.
Israeli leh Hamas leader te puhna hi nikum 7 October a Hamas silai keng ten Israel luta mi 1,200 chuang tihlum leh mi 252 mitang atana an hruai luih atanga intan a ni a. Israel in a chhanletnaah Gaza a Palestinian mi 35,500 chuangin nunna an chanphah tawh thung.
US President Joe Biden chuan ‘Israel leh Hamas te ang khatin ngaihtheih a ni lo’ tiin a sawi a, “Chiang takin Israel chuan civilian te an him theih nan theihtawpin hma a la a ni” tiin Biden chuan a sawi bawk.
US Secretary of State Antony Blinken pawhin president demna chu thlawpin Washington chuan ICC thutlukna chu a ‘pawm lo bur’ tia sawiin ‘a zahthlak’ tiin a sawi a. “ICC in engmah thuneihna he thilah hian a nei lo” a ti bawk.
Blinekn chuan manna thupek chhuah chuan inkahhai a awm theih nana hmalakna te a tithuapawm zawk dawn a ti bawk.
ICC chief Khan chuan Gallant mai bakah Hamas political leader Ismail Haniyeh leh Hamas military chief Mohammed Deif te manna thupek a tichhual tel bawk thung a.
Israel prime minister leh defence minister te chu civilian te riltama siamin chu chu indona hmanruaah hmangin civilian te thihna nasa tak an thlen a ni tiin ICC chuan a sawi a.
Prosecutor te chuan Hamas leader te bikah chuan an pawi khawih chu 7 October 2023 atanga intan a ti a, Israeli leader te pawikhawih chu 8 October 2023 atanga intan a ti thung.
ICC chuan thutlukna an siam chu thlawp tlatin theihtawpa hmalakna an nei chungin Israel in engmah puh an nihnaah hmalakna mumal a nei duh lo a ti bawk a.
ICC a panel of judges te chuan manna thupek tihchhuah tur a nih leh nihloh an ngiahtuah zui ang a, an tichhuak a nih chuan ICC a tel ram te chuan lohtheihlohin an man ngei a tul dawn thung a ni.
Israel prime minister nihna chel rei ber tawh Netanyahu chuan amah man tumna awm chu nataka demin ‘awm ang lo lutuk leh thupek dik lo’ tiin a sawi a.
Hebrew hmanga thuchhuah a siamin ICC te hian ‘eng nge huai theihna an neih’ tih leh ICC te chu Hamas leh Israel khaikhin chhin eihlo turin a ti bawk a. Israel leh Hamas ang khata ngaih chu thil nihna dik tak pehhel tumna tiin Netanyahu chuan a sawi bawk.
ICC prosecutor chu khawvel hmun hrang hranga Israel te huatna thleng meksa tawhah gasaline leihbelh tiin a dem thu a sawi bawk.
Israel Foreign Minister Israel Katz pawhin Khan a thutlukna siam chu 7 October 2023 tuartute ‘hmalam atanga huaisar taka inbeihna’ tia sawiin kha thil duhawmlo tak kha theihnghilhin a awm ngai lovang a ti bawk.
Israel Western allies te chuan tlanghrakin ICC chu an sawisel duh lo thung a. French foreign ministry chuan court thutlukna chu a thlawp thu sawiin Germany foreign ministry pawhin ICC independence na leh kalphung chu a zahthu a sawi a.
Mahse Berlin chuan Israeli leh Hamas leader te ang khata ngaihna chu a dik lo a ti thung.
Hamas te chuan thuchhuah an siam zuiah Palestinian resistance leader te manna thupek chu cancel vek turin ngenna an siam thung a. “Hamas chuan International Criminal Court prosecutor tena tuartu leh tawrhtirtute ang khata a ngai hi a dem a ni” tiin an sawi a.
Hamas te chuan Netanyahu leh Gallant te chu thlasarih hnuah chauh manna thupek tihchhuah tum a ni chauh a, Israel political leh military leader dang te hming sawilan a ni ve lo chu an dem thu an sawi bawk.