IFPI Global Album Award dawngtu Bad Bunny ‘Un Verano Sin Ti’

IFPI Global Album Award dawngtu Bad Bunny ‘Un Verano Sin Ti’
Khawvel huap recorded music industry suihkhawmtu pawl IFPI chuan 2022 Global Album Award dawngtu chu Bad Bunny album ‘Un Verano Sin Ti’ a ni tih an puang. Bad Bunny hi Latin American artist zinga IFPI Global Chart Award dawng thei hmasa ber a ni.
Un Verano Sin Ti hi a hlawhtling hle a, he Puerto Rican zaithiam, Bad Bunny album pangana a ni a, nikum May thlaa a tlangzarh kha niin, hla 23 awmna album a ni a, a hla zawng zawng hi Spanish vek a ni a, Billboard 200 (albums) chart-ah No.1 niin, kar 13 chhung a No.1 a, e chart-a Spanish hla hlang awmna album No.1 ni thei hmasa ber a ni niin, Spanish hla hlang awmna album Grammy Awards-a Album of the Year category-a nominate ni thei hmasa ber a ni bawk.
Global Albums Chart-ah hian zaithiam dang Taylor Swift chu IFPI Global Recording Artist of the Year 2022 niin, a album ‘Midnights’ chu IFPI Global Album Chart-ah hian No.2 a ni a, a hla ‘As It Was’ avanga IFPI Global Single if the Year Award dawngtu British zaithiam Harry Styles album ‘Harry’s House’ chu No.3 niin, Olivia Rodrigo ‘Sour’ chu No. 9 a ni a, Ed Sheeran ‘=’ chu No.10 a ni bawk.
IFPI Global Album Chart-ah hian South Korean act pawh an langsar riau a, Top 20-ah pariat an lang a, chung zingah BTS an sang ber a, an album ‘Proof’ chu No.4 niin, Stray Kids ‘MAXIDENT’ chu No.6 a ni a, Stray Kids album dang ‘ODDINARY’ chu No.14 a ni a, SEVENTTEEN album ‘Face The Sun’ chu No.7 niin an album dang SECTOR 17 chu No.18 a ni bawk a, TOMORROW X TOGETHER leh ENHYPEN te pawh a vawi khat nan Global Albums Chart-ah langin, No.11 leh No.16 an ni, BLACKPINK album ‘Born Pink’ pawh No.8 a ni.
IFPI Global Albums Chart hi format hrang hrang a khawvel huapa zaithiam te album hralh tam dan atanga teh a ni a, physical sales leh digital sales bakah streaming platform hrang hrang te pawh en a ni.