Inremna anga awm lo company hnathawkte dan hnu ah inrem

National Highway 54 kawngpui laih zauh hna thawh mekah thlanmual kawng tihpin siamthat dan tura inremna neih tawh anga hna thawk zui lo KRAM company hnathawkte chetna tur chu YMA lamin an dang a, Thawhtanni vek khan inremin company lam hian an lo inrem tawhna hi an tihlawhtling.
Thudawn danin, YMA New Serchhip North Branch chuan NH-54 kawngpui laih zauh hna thawh mekah an veng thlanmual panna kawng tihpin a ni a, a hmaa thlanmual kawngah hian kawngpui tihzauhna tur retaining wall sang tak siam a ni. Hei hi duh loin YMA hian hnathawktu KRAM company hnenah an thlanmual kawng siam turin an lo nawr tawh a, hemi chungchang hi Serchhip bawrhsap hnenah pawh an lo thlen tawh a ni.
Hemi hnu hian YMA leh KRAM Company bakah Serchhip DC aiawhte leh khawtlang hruaitute nen a hmunah an enho a, dawhkan kila inbe zui turin inthlah mah se, inbiak hma-in Company hotute hian YMA hruaitute be pawpin, an duh anga thlanmual kawng chu an siamsak theih tur thu an hrilh a, Company lamin YMA duhdan anga an siam theih thu an sawi takah chuan dawhkan kila inbiak pawh zui a ni ta lo a ni.
Company lamin a hmaa an inremna ang ni loa thlanmual kawng hi an siam avangin YMA lam hi an lungawi loh bakah thlanmual chhaklama leivung paih tawh lo tura an tih pawh ngaipawimawh loin an paih chhunzawm a. March 6 khan company lam hnathawk tur lirtheite hi New Serchhip North YMA member-te chuan an huamchhungah an dang a, company lam lirthei engemawzat a tangkhan hnuah inbiak a ni a, YMA duhdante an tihhlawhtlin tur thu an sawi hnuah lirthei dan hi tihtawp zui a ni.