Israel infiammite visa an pe duh lo!

Israel infiammite visa an pe duh lo!
Karleh mai hi Islam sakhaw vuantu tam berna Indonesia rama World Artistic Gymnastics Championships tan hun a nih tawh laiin Gaza laka phuba lakna raphlak kalpuitu Israel gymnast-te tan an ram luh phalna ‘visa’ an pechhuak dawn lo tih championship thlengtu tur Indonesia sawrkar chuan a puang!
Heti a nih takah chuan defending world floor champion Artem Dolgopyat pawhin a title kawl lai a humhim thei dawn lo tihna a ni ang.
Two-time Olympic floor medallist Dolgopyat hi Paris 2024 Olympics-ah pawh khan mi ngaihven hlawh zinga mi a ni a, Indonesia sawrkar thutlukna avangin championship hmachhawn thei lo dinhmunah a ding ta a ni.
Israel Gymnastics Federation (IGF) chu infiamna huanga thuneitu sang ber Court of Arbitration for Sport (Cas) hnenah zualko nghal mah se Cas chuan Israel team laka Indonesia thutlukna siam hi a thiahsak duh ta lo a, kawng dan zawnpui vat tura an dilna hnawlsak an nih hnuah IGF chuan Cas thutlukna avanga an lunghnur thu thuchhuah siamin an tarlang.
Israel lam ngenna (appeal) hmasa hnawlsak an nih hnuah IGF hian ‘appeal’ dang siam nawn leh bawk mah se Pathianni maia tan tawh tur World Championships hma chuan Cas hian Israel lam dilna hi an ngaihtuah hman tawh dawn lo!
IGF duhdan ang chuan Cas hian International Gymnastics Federation (FIG) hnenah Israel team tel theihna ngaihtuahpui turin thupek a tichhuak ang a, Israeli gymnnast rualte hnena Indonesia-in ‘visa’ a pe duh lo lui zel a nih chuan October ni 25 thleng awh tur he championship hi Indonesia atanga sawnchhuah emaw cancel rih emaw tur a ni a, mahse, Cas ber hian FIG hnenah eng thupek mah tichhuak duh loin Indonesia sawrkar thutluknaah inrawlh theihna an nei l tiin Israel dilna hi a hnawlsak ta mai a ni!
IGF lungawilo thuchhuah pawh hi a rum al mai a, Cas thutlukna chu an tana a nat mai piahlamah ram pakhat sawrkar thutlukna avanga ram pakhatin World Championship an khel thei lo ngawt zel tur chu dik theia an hriat loh thu leh an sport buaipui tan pawha hnuhma chhe tak hnutchhiahtu a nih thu an tarlang a; rim taka lo inbuatsaih ve ngar ngar gymnast rual leh staff-te rilru a tihhnual man ngawt pawh hi a tam hle niin an sawi.
Gymnast hming hraw zinga mi Dolgopyat pawhin Indonesia leh Cas thutlukna chu Instagram kaltlangin a sawisel na hle a, anmahni lam tawrhna piahah gymnastics game tan pawh pawi thei tura a ngaih thu thlenga sawichhuakin, he tihphung chhe tak hi an dolet zui zel tur thu leh justice an sualchhuah ngei a beisei thu sawiin, tuntum World Championships an hmachhawn thei lo phawt tur erawh pawi a tih takzet thu a tarlang tel.
Dolgopyat bakah hian Israel gymnast dang panga – Eyal Indig, Ron Pyatov, Lihie Raz, Yali Shoshani leh Roni Shamay-te pawh Indonesia ram tournament lianah hian an inlan thei dawn ta lo a ni.
Kum 28 mi Dolgopyat hian Tokyo 2020 Olympics-ah khan Olympic floor gold awrhin, nikum khan Paris-ah silver medal a dawng leh a; tum hnih lai European champion a ni tawh bawk.
Football lam chuan Indonesia hi an dim vak lo a, kum 2023 khan he ram bung khat Bali governor-in Israel team mikhual a remtih loh avangin Indonesia atangin football Under-20 World Cup an sawnchhuak lawng lawng!
Tarlan tawh angin, Indonesia hi khawvela Muslim-te chen tamna ber ram niin, Israel nen hian diplomatic thila inzawmna mumal nei lo ram zinga mi an ni a, eng lai maha Israel ram thlawp ngai lo niin, 1962 Asian Games an thlen tum pawhin Israel infiammite hnenah tuntum ang bawk hian ‘visa’ a lo pechhuak duh tawh lo a, kha vang khan 1964 Olympics-a an ram infiammite inlan thei lo turin International Olympics Association-in a lo dangbet tawh a; a hnuah he thutlukna hi sut leh mah se Indonesia chuan he Games hi a boycott zui ta tho a ni.
Tuntum pawh hian International Gymnastics Federation lamin world championship an thlen tur hi a chhuhsak mai rinna a pian hman hnuah a ngawi zui ta daih a; Juda-ho innghahna dang Court of Arbitration for Sport ber pawhin a hnuchhawn ta a nih hi!
Kan hriat angin, kum 2023 October ni 7 khan Hamas kaihhruai firfiak tam takin Israel ram lutin, a hmunah mi 1,200 an thah bakah midang 251 zet Gaza lamah an hruai a; Israel phuba lakna a sosang vet vet hle a nih kha!
Israel beihletna avangin Palestinian 67,000 thiin, Gaza chu a tlusawp vek a tih theih a; United Nations chhut danin Gaza khawpuia in ding hmun 10-a thena hmunkua chu a chhe vek a ni!
Tunah US president Donald Trump-a hmalakna avangin indona a tawp lailawk rih a, Hamas hrenbeh mitang leh mitthite pawhin Israel ram an lut leh ta a, Israel hawtute huatna erawh a pun belh ting niin a lang!
Thla hmasa mai September thla pawh khan Spanish Prime Minister Pedro Sanchez chuan Gaza lama an chet dan avangin international sports competition zawng zawnga Israel teltir ve loh a lo rawt tawh a; ram tamtak pawhin international football-a Israel ‘suspend’ an ngiat bawk.
Israel football team
Hei em erawh a takah a la chang lo a, mahse, Thawhlehni FIFA World Cup – UEFA Qualifiers match pakhata Italy an luhkhung tumin Udine khuaa Bluenergy Stadium chhunga pungkhawm Italian fans chuan Israel anthem chhuah lain an ‘boo’ khum hluah hluah thung!
Italy hian sithum faiin an mikhual Israel hi an sawp a; Azzurri tan Mateo Retegui chuan goal hnih khungin, hun tawp dawnah Gianluca Mancini goal khat hmuh tur a awm bawk a, an kawtkaia an point thum hlawhchhuah hmangin Italy chuan World Cup playoff hmun an chang hram!
He inkhel vuakvetah hian Palestinian lam tantute’n kawng an zawh avangin Udine kawtthlerah police leh pro-Palestinian march huaihawttute an innawrbuai hial a ni.
Italy hi World Cup hnuhnung vawi hniha an inlan phak loh ve ve tawh hnuah nakkum tournament pawh hi an khel dawn em a chiang lo leh ruai tawh a, qualifying match hnih chiah khelh tur awm tawhah point 18 hum chungin Norway chuan Group I hma an hruai a, point 15 neitu Azzurri dinhmun hi a him lo leh hle tawh a ni!
Game khat chiah khelh hmabak nei tawh Israel lakah Italy hi point rukin an sang a, Juda-ho tan Gennaro Gattuso team hi lehpelh ngaihna an wm tawh lo.
Italian-ho hian November ni 13 hian an group mawngphah Moldova an luhkhung dawn a, beisei tur leh hlauhthawn tur ei tawh lo Moldovan-ho hian an loi chaihbuai ve hrep thei a; ni thum hnuah an group hmahruaitu ni thei khawpa team khawng Norway an mikhual zui leh dawn a, hei hi an group dinhmun tichiangtu a ni tawh ang.
Norway hi point-ah an nihrualpui pha a nih pawhin Erling Haaland hoa goal khung harsat lo Scandinavian-ho hi goal difference-ah Italy hian an phak tawh a rinawm chuang lo a, Gattuso team hian 2026 finals beisei zui turin nakkum March thla hian playoffs an khelh tho tho a rinawm!
Azzurri defender hlui Gattuso beiseina pawh a chau sawt tawh khawp mai a, “Tunah chuan kan laka Pathian zahngaihna leh ngilneihna chiah kan beisei thei ta. Chu tah pawh kan player-te kan hloh then a rem lo hle tawh a, club lama an chetthat ang tiat tala an khelh a pawimawh ang,” tiin an dinhmun khirhzia a sawichhuak!