Israeli pathum leh Palestinian mi
tang inthleng belh leh
Hamas-in Gaza-a an hren Israeli pathum chu Inrinni khan an chhuah a, Israel pawhin a thleng nan Palestinian lung in tang 183 a chhuah ve bawk.
Yarden Bibas, 34, Ofer Kalderon, 53, leh Keith Siegel, 65, te hi Red Cross kutah an hlan a, thla hmasaa inkahhai an puan atangin mi tang leh mi hren an chhuah mek zel a ni.
Palestinian lung in tangte hi bus-in Gaza leh West Bank-ah phurh luh an ni a, a tam zawk hi a bul mai, Ofer lung ina tangte an ni.
Ningania mi tang leh hren an inthleng hnuhnung ber khan boruak a sosang deuh va, Israel chuan Palestinian a chhuah turte a tikhawtlai nasa nia sawi a ni.
Inrinniah erawh engmah harsatna awm lovin an inchhuahsak a. Gaza-ah chuan Hamas hmai tuam leh silai kengten an chhuahsan turte mipui bawr luih luih karah an hruai a, an hnungah indonaa an hruaitu thah takte thlalak lian tak tak an tar bawk.
Red Cross-in Kalderon-a leh Bibas-a chhuah an ni tih entirna lehkha hming an ziak a, Khan Younis-a mipui hma atangin an kalpui a. US-Israeli Siegel-a erawh Gaza City atanga chhuah a ni a, hetih lai hian Hostages Square, Tel Aviv-ah chuan mipui tam takin auvin an lawmzia an lantir.
West Bank-a Ramallah-ah pawh Palestinian lung in tang chhuah takte chu mi tam takin an lo lawm ve bawk.
Israel-in a chhuah tak zinga a tam zawk hi ‘administrative detention’ tia a sawite an ni a, eng thubuai mah siamsak lohva lung ina an tantir an ni hlawm a. Thenkhat erawh pawi nasa taka khawihte pawh an awm ve bawk.
Palestinian Prisoners’ Association chuan mi 54 chu hun rei tak tang tur niin 18 chu dam chhung tang tura tih an ni tih an sawi.
October 7, 2023-a Hamas-in Israel rûna mi 1,200 chuang thata hren tua Gaza-a mi 251 a hruai hnua Israel-in phuba lak nana Gaza a beih atang khan mi 47,500 dawn an thi tawh niin Hamas enkawl Gaza health ministry chuan a sawi.
Mi hren chhuah tur hian Israel leh Hamas hi January 19 atang khan inkahhai an puang a, thawh khatnaah hian mi hren 33 chhuahin Israel-in an mi tang 1,900 a chhuah danw bawk a. Hetih karah hian ni tin Gaza-ah mihring mamawh phur lirthei tam tak luhtir an ni bawk ang tiin an inrem.
Gaza leh Egypt inkalpawhna, mamawh phurh luhna ber, Rafah crossing pawh thla riat khar a nih hnuah Inrinni khan hawn veleh tawh a ni.
Gaza health ministry chuan he kawng atang hian damlo na zual 50 chu Egypt-a inenkawl turin an kal nghal tih apuang.
Inkahhai chhung hian Palestinian tlanchhia sang tel chu an chenna, Gaza hmar lamah haw phalsak an nih angin an kir mek zel bawk.
Israeli pathum leh Palestinian mi tang inthleng belh leh
Get real time updates directly on you device, subscribe now.
Prev Post