US President Joe Biden chuan Ukrainian official ten an ngen nasa viau chungin US chuan F-16 fighter jet a pek dawn loh thu a sawi.
-- Advertisement --
Report ten US-in indo thlawhna Ukraine hnenah a pe dawn em tia an zawhna chu Biden chuan ‘Dawn lo’ tiin a chhang a ni. A hma lawkin Germany pawhin fighter jet pek an tum loh thu an sawi tawh bawk.
Ukraine chuan Russia nena indona an kalpui mekah an airspace venhim nan fighter jet a mamawh thu a sawi thung a.
F-16 Fighting Falcons chu khawvela fighter jet-a rintlak bera ngaih reng thin niin ram dang heng Belgium leh Pakistan te pawhin an hman nasat a ni a.
Ukraine hian Soviet-era fighter jet te a la hmang a, kum 30 kaltaa USSR atanga a indana a fighter jet te ang bak kha a la neih belh lo a ni.
Biden chuan Ukraine-in jet a dil chu hnawlsakin mahse thil dangah military support pek chu an thlurbing zel dawn tiin a sawi thung a.
Kar kalta khan US chuan Kyiv hnenah Abrams tank 31 a pek tur thu puangin UK leh Germany te pawhin an tank chhuanvawr te an pek tur thu an puang zui bawk a.
Ukraine’s Deputy Foreign Minister, Andrii Melnyk chuan khawthlang ram te chu ‘fighter jet coalition’ siam tura ngenin chumi hmang chuan Ukraine chuan Eurofighters, Tornadoes, French Rafaels leh Swedish gripen jets te a neih theih phah dawn a ni tiin ngenna a lo siam tawh thung.
Germany Chancellor chuan Leopard 2 tank Ukraine hnena pek an remtih tawh laia ralthuam dang pek belh zel chu awm ang rih lo tiin a sawi a. Olaf Sholz chuan Nato military alliance te chu Russia nen an indo lo tibawkin chutiang zawnga thil awm thei tur chu an hmehmih zel tur thu a sawi bawk.