Khawlum lutuk vangin Europe buai zel
Europe khawmualpui zau tak chu heatwave-in la tuam mek zelin khawlum lutuk avang hian ram ngaw kang a nasa hle bawk.
Italy-a Sicily-ah chuan temperature-in record siamin 46.30C a kai a, Greece leh Swiss Alps-ah chuan ram ngaw kang turu tak thelh tumin theihtawp chhuah a ni mek thung.
Scientists te chuan climate change avangin heatwave te chuan a awh rei a, a nasa zual tawh bawk a, a thleng zing tial tial bawk tiin an sawi.
Khawvel pum huapin extreme weather chuan mi maktaduai tel tehmeuhte nuaiin US leh China ah te pawh temperature sang turu bakah East Asia-ah te chuan ruahsur a nasa hle thung.
World Meteorological Organization (WMO) te chuan heatwave chu a thleng zing tial tial ang a, a kum telin a nasa tial tial dawn, an ti bawk a. Hei vang hian climate action lamah nasa zawka hmalakna neih a ngai an ti.
“Heng events te hi a nasa tial tial dawn a, khawvel chuan heatwave nasa zawk hmachhawn tura a inpuahchah a ngai a ni,” tiin John Nairn, senior extreme heat advisor, UN agency chuan a sawi.
Thawhtanni atang khan Greece ah chuan hmun hrang hrangah ram ngaw kang a awm a, hei vang hian summer camp-a awm mek naupang 1,200 chuangte chu hmun hima thiar an ni.
Greece-a kangmei nasa ber hi Athens hmar lama Dervenochoria region-ah niin satellite atang pawhin kangmei khu a hmuh theih a. Tuipui kam hnaha Corinth khawpui khawpui te Loutrakii-ah te leh chhim lama Kouvaras ah te pawh kangmei a chhuak nasa hle.
Europe hmun dang Switzerland ah te pawh kangmei a chhuak nasa hle a, thuneitu ten thelh tumin theihtawp an chhuah mek bawk a.
Spanish island La Palma a kar kalta Inrinni atanga kangmei chhuak pawhin chenna in 20 a kang chhe tawh a. Mahse, zan lama temperature vawt deuh hlek leh air humidity sang chuan firefighter te puiin kangmei hi an thuhnuaiah an dah thei tawh thung.
Italy, Spain, Greece leh Balkans ramah te khawlum lutuk avanga mipuite fimkhur tura tihna red alert chu kalpui a la ni mek bawk a.
Europe-ah hian temperature record sang ber chu August 2021 a Sicily a Palermo region a record kha niin 48.80C a kai a, hei hi chu khumin a la awm rih lo.
Khawlum turu hian Europe mai ni lo US leh China hmun thenkhatte pawh a nuai mek bawk a. US southern state-a mipui maktaduai 80 vel te chu heatwave thleng mekah fimkhur tura tihin an awm mek a ni.
China-ah chuan Pathianni kalta khan temperature record san ber tawngin Xinjiang region-ah 52.20C record a ni hial a ni.