Khawzawl-in fai ber lawmman lak lawm

UD&PA department bultuma Mizoram Khawpui Fai Intihsiakna 2022 kaltlanga District Headquarters category-a pakhatna latu Khawzawl chuan Thawhtanni khan an lawm a. UD&PA changtu deputy chief minister Tawnluia chuan a hmanpui. Khawzawla VC hrang hrangten an huamchhung khawlaia an hun tur bawlhhlawhbawm lian a sem nghal bawk.
Deputy chief minister chuan fai intihsiakna kum 2022-a neihah District Hqrs. huangah Khawzawl-in pakhatna a hauh leh, Khawzawl Dinthar VC-in District Hqrs. chhunga VC fai ber a ni chu lawmawm a tih thu a sawi a. Khawzawl bakah an district huamchhunga Biate leh Khawhai ten faina kawnga dinhmun tha tak an hauh chu lawmawm a tih thu a sawi. Faina leh thianghlimna chu hmasawnna kawnga pawimawh tak a ni, tiin, fai reng turin taimak a ngai a, taksa, in leh a vel leh vantlang hmun vawngfai reng turin thahnemngai taka thawhho tlan a pawimawh tih a sawi a ni.
Khawzawlah bawlhhlawh thliarhran tan a ni chu hmasawnna pawimawh tak a ni, tiin, faina chu naupangte atanga tana inzirtir a tul thu a sawi a. Bawlhhlawh paih mai turte atanga thil hlu leh tangkai zawk siam a nih theih nana hmalakna chu ngaihpawimawh a duh tih a sawi bawk.
UD&PA director H.Lianzela chuan Swachh Survekshan intihsiakna huangah North East State-te zone khatah awmin, Khawzawl chu zonal ranking-ah 30-na, state ranking-ah 5-na a ni tih a sawi a. Kum 2018-a ODF-a puan tawh Khawzawlin ODF Plus dilna a thlen chu endik thuai tum a nih thu a sawi.
UD&PA-in Mizoram khawpui fai intihsiakna 2022 a buatsaihah Khawzawl hi category-II – District Hqrs. zinga fai bera thlan a ni a, lawmman sumfai Rs. 3,33,333 leh citation a kengtel. Khawzawl Dinthar Village Council chuan District Hqrs. chhunga VC faina kawnga thawk tha – Best Village Council lawmman sumfai Rs. 77777 leh citation a dawng. Khawzawl district Biate chu category-III (Urban Towns) ah pahnihna a ni a, lawmman sumfai Rs. 2,22,222 leh citation a dawng a ni.
Mizoram khawpui fai intihsiakna kaltlang hian Khawzawl hi kum 2020-ah 3-na, 2021 ah 4-na dinhmun a ni tawh a, kum 2022 ah 1-na a ni.
Tuichang bialtu MLA ni bawk Tawnluia hian Arro khua tlawhin vantlang inkhawm a hmanpui a; khawtlang mamawh leh tulte sawiin an inkawm.