Kristian hum zo lova a puh Nigeria-ah Trump-a’n sipai tirh tum

Kristian hum zo lova a puh Nigeria-ah Trump-a’n sipai tirh tum
US President Donald Trump-a chuan a sipaite chu Nigeria-a Islamist hel pawl bei tura inpuahchah turin thu a pe a, sorkar chu Kristiante hum zo lovah a puh.
Trump-a hian eng inthahna nge a sawi chiah hriat a ni lo va; mahse, tun hnaiah Nigeria-a Kristiante chu suat an ni tih thu a thang nasa hle.
Tharum thawhna thleng thlithlaitu pawlte erawh chuan Nigeria-ah hian Kristiante chu Muslim aiin thah an ni tam zawk tih finfiahna a awm lo tih an sawi a, sakhaw zuitu pahnihte hi an inthen phawk a ni.
Nigerian president advisor chuan jihadist pawlte laka sipaite chetna chu a huhova chetna zel a nih tur thu BBC a hrilh.
Daniel Bwala-a hian Nigeria chuan US-in Islamist hel beihnaa a pui tur chu an lawm em em rualin ‘ram pakhat’ a ni ve tih hre reng turin an duh tih a sawi.
Jihadist-te hian sakhaw pakhat tum bik pawh an nei lo va, eng rina nei pawh, rinna nei lo thlengin an that mai niin a sawi bawk.
President Bola Tinubu-a pawhin sakhaw zui avanga intihduhdahna an ramah a awm lo tih a sawi a, venhimna thila chak tawk lohna chuan ‘eng rinna nei leh ram bial tin’ a fan vek zawk niin a sawi.
Trump-a hian Inrinni (India-a Pathianni) khan social media-ah US Department of War chu ‘che chhuak thei turin’ inring turin a ti tih a tar lang.
Nigerian sorkar a che chhuak lo a nih chuan sipai a thawn mai thei tih a sawi a, heti a nih chuan puihna an pek thin pawh an tihtawp nghal vek tur thu a tar lang bawk.
Trump-a chuan, “Kan bei a nih chuan rang takin, fing takin, na takin, firfiakten kan Kristianpuite an beih angin a ni ang,” a ti.
Pastor nia insawi, Bwala-a chuan BBC-a Newshour programme-ah Trump-a hian ‘thil sawi dan bik’ a nei a, a sawi ang anga thil an lak dawn loh thu a sawi.
“Trump-a’n kan him loh avanga min puiha min beihpui a tumna rilru erawh kan hre thiam,” a ti a. President Tinubu-a nen pawh an inbiak thuai a beisei thu a sawi bawk.
A hmain Trump-a hian Nigeria hi Kristiante tana hlauhawm tak tak a tam avangin ‘Country of Particular Concern’ tiin a lo puang tawh a. Hetianga puan hi US State Department-in ‘nasa taka sakhaw zalenna palzutna thlenna ram’ a sawina a ni.
Hemi hnuah hian Tinubu-a chuan US leh ram dangte nen eng rinna nei pawh an himna tura thawhho a duh thu a sawi zui.
Nigeria hmar lamah hian kum tam tak chhung Boko Haram leh Islamic State West Africa Province an tal na hle tawh a, mi sang tel an that tawh a, henga a tam zawk hi Muslim an ni thung niin khawvel puma politics thila tharum thawhna thleng thlithlaiutu, Acled chuan an sawi.
Nigeria lailiah Muslim ran vultu leh lo nei mi, Kristiante chu tui leh ram tha inchuhin an intibuai reng bawk.