Pope Francis leh Prostestant church England leh Scotland leader te chuan dan pawna mawngkawhur hnawlna chu an sawisel.
South Sudan a tlawh hnuah Pope chuan hetiang dan te hi sual a ni a ‘injustice’ a ni tiin a sawi bawk a.
-- Advertisement --
Mawngkawhurna lam awn te pawh hi Pathian fate an ni thova kohhran chuan an vaiin a lo lawm em em tur a ni, a ti bawk.
Pope thusawi hi Archbishop of Canterbury leh Moderator of the Church of Scotland te chuan an thlawp thu an sawi a.
Archbishop Justin Welby leh Iain Greenshields, Moderator of the General Assembly of the Church of Scotland te chuan Pope hi zuiin South Sudan an kal ve a, indonain a tihbuai ramah hian inremna a awm theih nan ngenna an siam a ni.
Tun hi khawvela kohhran lian pathum leader te kum 500 hnua inhmuhkhawm neia an zinho leh hmasak ber tum a ni bawk a.
Archbishop Welby leh Dr Greenshields te chuan Pope thusawi chu an fak thu sawiin, “A thusawi tin te kha ka thlawp vek a ni,” tiin Archbishop Welby chuan a sawi a, Anglican church te phawin gay right chungchangah ngaihdan inang lo an neih ve tho thu a sawi bawk.
Thla kalta khan Church of England te chuan an hnuaia kohhran tinah neih in ang inneih an remti dawn lo tiin an lo sawi tawh a.
Dr Greenshields chuan Bible a inziak chungchang sawiin, “Chanchintha Bu pali-ah hian Isua-in mi a hmuh apiang hnenah hmangaihna a lantir bak hmuh tur ka hmu lo va, Kristian te chuan eng hunah pawh kan mihringpuite hmangaihna lantir chu tihmakmawh a ni,” tiin a sawi.
News conference a neihnaah Pope Francis chuan Catholic Church chuan neih inang te inneih phalna a pe thei lo a ti a. Mahse, civil union dan hmanga inneih chu a thlawp thu sawiin mawngkawhur dan pawna hnawl ringawt chu ‘harsatna kan ngaihthah theih loh a ni’ tiin a sawi bawk.
Khawvel ram hrang hrang 50 chuang te chuan LGBT mi te chu dan pawnah kawng khat talin a hnawl ani a ti a, ram 10 vel te chuan mawngkawhur te chu thi tura an chungthu rel theihna dan an nei a ti bawk a.
Tun dinhmunah UN member ram 66 zet te chuan remtihna neia neih inang inkawpte chu dan pawnah a hnawl tiin ILGA World – the International Lesbian, Gay, Bisexual, Trans and Intersex Association te chuan an sawi a. “Hei hi a dik lo a ni. Mawngkawhurna lam awn mi te hi Pathian fate tho an ni” tiin Pope chuan a sawi bawk a. “Pathianin a hmangaih a. A awmpui a, chung te mi thiam loh chantir ngawt chu sual a ni,” tiin a sawi bawk.
Catholic doctrine hman mekah gay relationship chu ‘deviant behaviour’ kalsualna tiin a sawi a, Pope Francis hian a hma pawhin Catholic puithiam te a mawngkawhurna chungchangah hlauhthawn a neih thuk thu a lo sawi tawh bawk.
Conservative Catholics thenkhatte chuan sexual morality chungchangah Pope chu hriatthiam har taka thusawi chingah puhin an sawisel ve thung a.
Kum 2013 khan Pope a nih tirhah Catholic Church dinna mawng-kawhurna chu sual a ni tih a pawm thu a sawi a, mahse, mawngkawhur awnna chu sual a ni lo a ti thung.
A hnu kum nga hnua Ireland a tlawhnaah Pope Francis chuan nu leh pate chuan an fate LGBT an awm a nih pawhin thlauthla mai lovin chhungkua inhmangaih taka enkawl zel turin a lo ti tawh bawk.