Sana cheinana lunghluhmang hnem record siam
India-a tlereuh lama sumdawng, Meerut lam chhuak Renani Jewels chuan Guinness World Record an siam a, an record siam chu sana chei nana lunghlu hmang hnem record a ni. Renani Jewels hian an sana chei nan lunghlu 17,524 an hmang a, chung zingah 17,512 chu lunghlu var niin, 12 chu a dum chi a ni ve thung.
Heng lunghlu zawng zawng hi a mal te tein sana-ah hian bel vek a ni a, a siamtute chuan he sana hmingah hian ‘Srinkia’ an ti a, a awmzia chu pangpar tihna a niawm a, pathiannu Lakshmi entirna niin, hmuingilna leh vanneihna kengtu pathiannu niin Renani Jewels Founder leh CEO Harshit Bansal chuan a sawi a, Bansal chuan, “He technology hian thil theih loh kha a theih tih a entir dawn a ni,” a ti.
He sana chei nana an lunghlu hman zawng zawng hi International Gemological Institute Lab-in an endik vek hnuah lunghlu dik tak a ni tih an pawmpui vek a ni a, a lunghlu te chu a mal te tein lunghlu lama mithiam bik ten an chhiar thlap bawk a ni.
He sana hi an chei zawh vek hnuah gram 373.30 a rit a ni a, inchei nan pawha bun chhuah theih a ni. A hmaa hetiang record siamtu chu December 2018 a Aaron Shum Jewelery Ltd., Hong Kong a mite siam niin, anni hian sana chei nan lunghlu 15,858 an hmang ve thung.