Pathianni zan khan ISL play-off semi-final second leg khelh a ni a, Mohun Bagan Super Giant chuan an mikhual Odisha FC chu si hnih faiin an hneh a, si belhkhawmah 3-2 a chakin final an lut. Mohun Bagan hian Mumbai City Fc leh FC Goa te inkhela chak zawk zawk an hmachhawn zui leh ang.
Semi-final thawh khatnaah 2-1 a tlawm tawh Mohun Bagan in an mualah hnehna chan ngei tumin tan an khawh. Salt Lake stadium-a mipui tling khawm mi 62,007 zette puihna hmangin an mualah ngei thothang tha takin an inlan. Inkhel tir lamah Odisha FC an hlauhawm zawkah goal an thun nghal teuh hle. An him hram hnuin Bagan in goal thun tumin tan an khawh nasa leh zua a, minute 22-naah an hlawhtling ta nge nge. Odisha FC si nghak in shot tha tak a dan per chu Jason Cummings chuan lei hrulah chiang zetin a pet goal a, hmahruaina goal a thun.
Minute 22-naa goal an thun vangin phur viau mah se Bagan in goal an thun belh thei lawk lo. Odisha FC hian chawhlawk hmain an si phurh an sut teuh hle a, goal line atangin Isak Ralte chuan a petchhuak hman hlauh a, Bagan a chhan him. Hemi hnu hian goal thun tumin innawr tawn viau mah se, inkhel hmuhnawm takah hun rei tak chhung goal a luh belh thei lova, si belhkhawmah 2-2 in an inhnehtawk rei hle. Extratimes khelh a ngai dawn nia a lan hnuin Bagan an che fuh hlauh a, goal pawimawh zet mai an thun. Hun tawp dawn hnaih minute 90+3-ah Sahal Abdul Samad chuan vei lam sir atanga cross tha zet mai chu vanneithlak ang reng takin a pet goal a, si belhkhawmah hma an hruai letna goal a thun.
Hun tawp dawn hnaiah goal an chhuah sut tumin Odisha FC in tan khawh nasa viau mah se goal an thun thei lo tluan a, Salt Lake Stadium-ah uiawm takin an tlawm. Pathianni zanah si hnih faia an chakna hmangin Mohun Bagan chuan si belhkhawmah 3-2 in hnehna hlu tak an chang a, ISL final an lut. ISL final hi May ni 4, Inrinni zan khian Salt Lake Stadium-ah khelh a ni ang.
Mohun Bagan in final an lut
Get real time updates directly on you device, subscribe now.
Prev Post