Minesota in semi-final an lut

Thawhtan zing khan NBA play-off khelh chhunzawm a ni a, Minnesota Timberwolves chuan Phoenix Suns hneh nawn lehin semi-final an lut. Inkhel dangah Indiana Pacers chuan Milwaukee Bucks an hneh a, semi-final an hnaih ve sauh bawk.
Minnesota Timberwolves lakah vawi thum tlawm zawn tawh Phoenix Sunsto hian chak ngei tumin tan an khawh a, bul pawh an tan chhe lo viau. Quarter hmasa pahnihah chungnung zawk an ni ve ve a, point 5-a hmahruai chungin chawlhlawk an hmang.
Hnufual zawk chungin chawlhlawk hmang mah se Minnesota hi chawlhlawk hnu lamah an khel tha a, quarter hnuhnung pahnihah chungnung zawk an ni ve ve. Quarter thumnaah point thumna an chungnung hnuin, quarter hnuhnung berah point 8 in an chungnung zui leh a, point rukin an khingpuite an lehthal. Game linaah point 122-116 a an chak leh tak vangin Minnesota Timberwolve hian 4-0 in Suns an sawp a, conference semi-final an lut ta a ni. Suns lakah vawi li chak zawna hnehna an chan hi kum 20 hnuah play-off ah game li la zawna an chak lehna hmasa ber a ni. Semi-final-ah Denver Nuggets leh Los Angeles Lakers te inkhela chak zawk zawk an hmachhawn zui leh ang.
A vawi li nan Phoenix Suns an hneh tum hian Anthony Edwards chuan point 40 a thawkchhuak a, ball sawhlet vawi kua a dawng tling bawk. Karl-Anthony Towns chuan point 28 a thawkchhuah bakah ball sawhlet vawi 10 a dawng tling bawk. An khingpuite lakah tlawm leh mah se Suns tan Devin Booker leh Kevin Durant te an khel tha dun hle. Booker hian point 49 zet a thawkchhuak a, hei hi NBA play-off-a point a thawhchhuah tam ber tum a ni a. Player langsar Durant hian point 33 lai a thawkchhuak ve bawk.
Thawhtanni zinga inkhel dangah Indiana Pacers chuan an khingpui Milwuakee Bucks chu point 126-113 in an hneh a, series-ah 3-1 hmahruaiin semi-final an hnaih lehzual. Pacers laka an tlawm tum hian hliam vangin an player pawimawh Damian Lillard leh Giannis Antetokounmpo te an chhawr thei lo va, hma takah Bobby Portis hnawhchhuah a nih vangin an chhawr rei thei lo bawk.