Mualkhanga gas thunna 2027-ah hman theih tum

Mualkhanga gas thunna
2027-ah hman theih tum
Metrin ton 900 gas dah theihna tura duan Mualkhang Gas Botling Plant chu kum 2027 kum tawp lamah hman theiha peih hman beisei a ni.
Zirtawpnia he hmun tlawhtu FCS&CA minister B Lalchhanzova chuan, chhawr tangkai thuai a nih theihnan sawrkarin theihtawp a chhuah a, clearance tih ngai zawng zawng pawh an tifel tawh tih a sawi.
Mualkhang Gas Botling Plant-a divisional general manager Z Lhungdim sawi danin, he plant buatsaihna hmun hi hectare 5.96 a zau a ni a, ruahman danah chuan ni khatah gas bur (cylinder) 7500 vel a thun khat hman dawn. A hmaa he hmuna ni khata gas bur a thun khah hman zat chu 2500 vel a ni.
He hmun din thar lehna tur sanction hi hmuh a ni tawh tih thawktute chuan an sawi a. A hma ami kha 11 TMTPA (thousand metric ton per annum) niin, tuna ami hi 30 TMTPA a ni dawn tih an sawi.
Supply minister chuan he plant siamthat a nih theihna tur hian MNF sawrkar lai khan ram an lo pe tawh a, ZPM sawrkar hnuah land lease tihfel sakin an hlanfel ta tih a sawi a ni.
Mualkhang GBP hi kum 2006-ah commission niin, engemawchen hman a nih hnu ah December 2019 ah enfiah a ni a. Gas dahna (bullet) a him tawk tawh loh avangin 2020 January 16 khan khar a ni. A aia lian leh changtlung zawka din thar leh tuma hma lak mek a ni.
Tripura atanga gas pipeline lokal mek chu kum 2027-ah Sihhmui terminal-ah phum zawh an tum niin minister hian a sawi bawk a. Hemi hnu ah Sihhmui atanga Aizawl-a lak chhoh hna leh connection pek hna thawh chhunzawm a ni dawn tih a sawi.
Aizawl khawpui bakah Kolasib tlangdungin an tangkaipui dawn niin a sawi. Hetihlai hian cylinder mamawhna pawh a tawp dawn chuang lo tih a sawi bawk.