Pathianniah sikhat faia an mikhual Fiorentina hnehin Juventus chuan Serie A table-ah pakuana an luah chho a; mikhual team kha an match hnuhnung vawingaah an chak zo lo fai vek tluang zel!
Turin khaw inkhela goal awmchhun kha first-half lama midfielder Adrien Rabiot tihluh niin, Juve-in season kal laiah match 14 chhung an lama goal lut tur an humhim thei a; 2021-22 campaign pumpui ai khan vawikhatin ‘clean sheet’ hi an nei tam der tawh!
-- Advertisement --
Game 22-a point 29 neiin Serie A table-ah an hmaa ding pathum hmakhalhin pakuana an luah chho a; pasarihna Torino leh pariatna Udinese aiin point khatin an hniam.
Pathianni zan inkhelah Juve hian minute 12-na lekah hmahruaina hun tha neiin, Angel Di Maria cross chuan Fiorentina defender pelin box chhunga awm Filip Kostic a tinzawn a, mahse, chep tak kar atangin left winger Kostic hian goal pawnah a petchhuak.
He Serbia left wing-back hian Juventus hmahruaina tur hun remchang dang hmu lehin, a shot chu goalkeeper Pietro Terracciano chuan a dansak.
Minute 34-ah Di Maria siamsak atangin Rabiot chuan hnai set sawt atangin mualneitu team hmahruaina goal a tauhlut ta tho a; Fiorentina goal-veng Terracciano hian Rabiot-a ball hi a beng sawn hman a, mahse, goalline technology hmanga endik a nih hnuah line a pel tih nemngheh a ni.
First half chhungin Fiorentina lam hian Juventus tlarhnung an chhaihbuai zo meuh lo a, chawlhlawk hnuah pawh an siphurh sut tur khawpin an nawr zo lo.
Juve striker Dusan Vlahovic chuan minute 59-ah sihnih faia hmahruaina goal khungin a inngai hman dawn thuak a, mahse, goalkeeper petkhuma a club hlui tana a goal hmasaber ni thei tur chu VAR-in a insiam chhoh laia offside a man avangin hnawlsak a ni.
Substitute Moise Kean pawhin Vlahovic a thlak hnuah Juventus tana goal hnih thun theihna hun tha bawhpelhin, a hmasa zawk chuan Terracciano a pel zo lo a, a dang chuan target a thelh.
Hun tawp dawnah substitute Gaetano Castrovilli chuan Fiorentina beiseina siamsakin a low shot kawh tak chuan Juve keeper Wojciech Szczesny a pel ngei a, mahse, VAR-in offside vangin a hnawlsak ve leh.
Ningani zan Europa League lama Nantes mikhual tur Juventus hian February ni 19 Serie A match-ah Spezia luhkhungin, point 24 nena table-a 14-na daih luah tawh Fiorentina pawhin he mi ni tho hian 12-na luahtu Empoli an mikhual ve thung ang.