Philippines-a lirnghingah mi 19 vel thi awm tawh

Philippines-a lirnghingah mi 19 vel thi awm tawh
Philippines chhim lama Mindanao thliarkar tuipui kamah magnitude 7.8-a na lirnghing vangin mi 19 an thi tawh niin thuneituten an sawi.
Lir hi Thawhtanni zing dar 07:37 (India-a Thawhtanni zing dar 05:07) khan a nghing a, Philippines, Indonesia, Japan leh Australia-ah te tsunami thleng thei vanga inralrinna tihchhuah ni mah se a hnu darkar eng emaw zatah phelh a ni.
Video leh thlalakah chuan building a chim tih a lang a, Jollibee fast food restaurant chu chim vek lai video pawh a tel.
Tual chhung thuneitu chuan province eng emaw zat – South Cotabato, Sultan Kudarat, Sarangani leh General Santos khawpuiah mi 134 velin hliam an tuar nia sawi a. A zat chiah erawh national disaster agency-in an la chiang lo.
National Disaster Risk Reduction & Management Council-in thi leh hliam zat a puan hun hi thil thlen atanga ni khat velah a ni thin tlangpui a. Police, tual chhung thuneitute leh disaster relief agency bakah hmun dang atanga a zat an dawnte chu an phuah khawm thin a ni.
Philippine President Ferdinand Marcos Jr chuan thuchhuah siamin agency hrang hrangte chuan chhiatrupna thlenah hma an la ho mek tih a sawi.
“Sorkarin laipui a che me a, Mindanao hi kan thlahthlam dawn lo,” a ti.
Marcos-a hian lirnghingna hmunah zirna tawpsan turin thupek a chhuah bawk a, Philippines-ah hian sikul luh tan ni chiah a ni.
Davao Occidental province-a primary school pakhatin video an tihchhuahah chuan zirlai hlauthawng tak takte chu a nghing laia an inkuah khawm lai hmuh tur a awm a. Video-ah hian an hnung lam in chung chim a lang bawk a; mahse, sikul chuan tumah hliam an tuar lo tih an sawi.
Lirnghing hmasa ber a thlen hnuah hian nghing nawn (aftershock) vawi 130 chuang a awm a, magnitude 1.3 atanga 6.7 inkar a ni.
Tuipui kam province, Sarangani-ah chuan lirnghing hian power leh inbiakpawhnate chu hun eng emaw chen a tichhia a, siam that thuai a ni.
Lirnghing irh chhuah tanna hmun bula khawpui, General Santos hi Philippines-a ‘tuna khawpui’ tia hriat a ni a. World boxing champion, a hnua politician ni ta, Manny Pacquiao-a khua tia hriat a ni bawk.
Philippines-ah hian lirnghing hi a thleng fo va, a thlen duhna lai, ‘ring of fire’ an tih hmuna awm a ni a. Nghing tam zawk hi tenau tak tak an nih laiin thenkhat erawh chuan thihna thlen thei a ni fo va. September thla khan ram lailia Visayas-ah magnitude 6.9-a naa nghing vangin mi 70 chuang an thi a ni.
Thawhtanni tuka lir a nghing hnu lawkah Japan-a thuneitute chuan tuipui kamah metre khata tui fawn a thleng dawn tih an sawi.
A hnuah chhim lama Okinawa prefecture-ah tsunami centimetre tlem a awmn a, a, Ogasawara Islands hla takah 20cm-a sang a awm thu thuneitute chuan an sawi bawk.
Indonesia, Palau leh Philippines tuipui kamah hmun hrang hrangah tui fawn a awm bawk a. A san zawng hi centimetre tlem te atanga metre 1. inkar a ni tih thuneitute chuan an sawi.