PSG chelhtu Le Havre

Chak se Ligue 1 title la fel mai thei tawh tur an nih laiin an mikhual Le Havre lakah Inrinni zan khan 3-3 draw an hlawhchhuak thei hram a, a zawna an league title pathumna tur hmin tur chuan a hnai berah May ni 12 an nghah leh rih phawt a ngai dawn.
Match 31 khel tling tawh PSG hian anmahni hnaihbertu Monaco lakah point 12-in hma an hruaifal mek a, nizan result tarlan hman loh pakhatah Olympique Lyonnais an hneh chuan Monaco hian an chung chiaha hmahruaitu team nena an inkar an pawtzim leh hret ang.
Inrinni inkhelah champion thar ni leh tura chak an mamawh laiin mualneitu team hian second half laihawlah pawh 3-1-a hnufual zawk an la ni a, Achraf Hakimi leh Goncalo Ramos-te goal hmangin an siphurh an sut zo thei hram a ni!
Le Havre tan Christopher Operi, Andre Ayew leh Abdoulaye Toure-te’n an khung ve bawk.
Tun kha Ligue 1 game bikah Le Havre tan PSG laka goal thum an tihluh tlin vawihihna niin, kum 1999 daih tawh khan mikhual PSG lakah 3-1 hnehna an lo chang ve tawh bawk a ni.
Season tawpa a chhuah ve tawh dawn avanga a tel loa nunchan zir an mamawh thu sawitu PSG boss Luis Enrique chuan Le Havre lakah an superstar striker Kylian Mbappe chu bench lamah bawk a hnutchhiah leh phawt a, an tlawm thei takngial dawna a lan hnu second half-ah Ousmane Dembele thlak turin luhtir bawk mah se team tan hlawkna lian a thlen zo ta bik chuang lo.
PSG hian niruk chhungin Borussia Dortmund chu Champions League semi-final game hnih an khelhpui dawn a, German club hi an paltlang chuan a vawihnihna atan he competition final hi an khel ang.