Quarry chimin a delhhnan ruang pathum hmu kim ta

Sihphir Neihbawiha stone quarry chima hnathawktu a delhhnan mi pathum ruang chu hmuh kim a ni a, a hnuhnung ber hi Pathianni – January 18 khan hmuh a ni.
Kumin January 9 chawhnu dar 3.30 vela he quarry chim hian a hnuaia thawk mi pali a delh a, hemi tlai hian a delh zing ami T Biakmuana, Daido khua (Aizawl district) Manipur atanga rawn chhuk chu a ruang lakchhuah nghal a ni a; pakhat dang chu hliam tuara chhanchhuah niin, a hliam a na naa, a nunna atana hlauhthawnawm a ni lo tih thu dawn a ni. Quarry chim hian an thenawma Rody Zothanmawia quarry-a hnathawk dang pahnih a chhilh tel a. January 14 chawhnu dar 4.45 khan ruang pakhat lakchhuah niin, Jharkhand lam mi Soren Tudu a ni. A ni hi helai hmuna a thawhna pawh a la rei lo nia sawi a ni. A dang pakhat hi ngawrh taka zawn zui niin, January 18 chawhnu dar 2.30 vel khan hmuh a ni a, amah hi Samal Chakma h/o Zosangliani, Lawngtlai district lam mi, Aizawla nupui inbengbel niin, Pathianni tlai la la khan vui a ni.
Quarry chimin a delhte lakchhuahnaah hian Sihphir khawtlang bakah Central YMA, District Disaster Management Authority Aizawl leh National Disaster Response Force lamin ngawrh takin a zawn hna hi an thawk a ni. He quarry hi Lalchangliana ta nia sawi a ni.