Ministry of Defence hnuaia National Defence College faculty leh course member-te, ni nga chama Mizoram awm mekte chuan Nilaini khan chief minister Zoramthanga an kawm.
Chief minister chuan sipai officer 18-te chu hun hlawk tak an hman a beisei tih a sawi a. Mizoram chu defence thlirna atang hmun pawimawh tak, history atanga thlir pawhin rei tak rambuai atanga remna leh muanna tluantling nei ta a nihna chu thil chhinchhiah tlak tak a nih thu te a sawi. Thenawm ram nena inlaichinna kawnga Mizoram pawimawhna an sawi ho bawk.
-- Advertisement --
Team hruaitu Maj. General Hari B. Pillai chuan National Security & Strategic Course zir mek India sipai officer-te leh India thiantha ramdang sipai officer-te chu Mizoramin tha taka a lo dawnsawn avangin lawmthu a sawi a. Mizoram an hmuh dante an sawi a ni.
Mizoram tlawhtute hi NDC faculty aiawh leh course member-te bakah ram paruk – France, Bangladesh, Oman, Japan, Uzbekistan, Bhutan atanga sipai hotute an ni a. Nilaini vek khan chief secretary Dr Renu Sharma an kawm. Mizoram chu state ralmuang leh hmun nuam tak, eco-tourism industry a haichhuah tur tam tak awmna a ni tih chief secretary hian lo hrilhin, an cham chhungin Mizoram dinhmun hrang hrang zir a, hun hlawk tak hmang turin a duhsak tih a sawi.
Planning secretary Lalmalsawma Pachuau chuan Mizoram dinhmun tlangpui a hrilh a. Sustainable Development Goals hlawhtlin nana sector hrang hrang – education, health, agriculture, rural development-a sawrkar hmalakna a sawi. Home commissioner & secretary H. Lalengmawia’n dan leh thupek kenkawh dan leh tun dinhmun a sawi bawk.
National Security and Strategy Course zir tur hian India sipai – Army, Navy leh Air Force atangte leh India thiantha foreign ram sipai, colonel leh a chunglam chinte thlan thin an ni a. Tunah hian he course zir mek hi team sarihah inthendarhin India ram hmun hrang hrang an fang a, hnam hrang hrang nunphung leh hnamzia zir a, mipui nunphung hre tura rawn zin an ni.