State pathum din champha lawm
State pathum din champha lawm
‘Ek Bharat Shreshtha Bharat’ hmalakna in larsap Gen. Vijay Kumar Singh (Retd) hoin Bihar, Rajasthan leh Odisha-te state puitlinga hlankai ni – ‘Foundation Day’ chu Thawhlehni khan Raj Bhavan-ah buatsaih a ni.
State tinin history hranpa theuh kan nei a, state hrang hrangte awmze nei taka remkhawm a nih theihnana hma latu langsar Sardar Patel a fakawm tih larsap hian a sawi a. India hmarchhak chu hnam ziarang leh nun dan phung hausa tak nei a ni, tiin, state dang atanga lokal chu hmarchhak state-a an awm chhung ngeia an culture-te zira hriatchian lehzual tum turin a chah.
“Hnam ziarang leh nunphung kan inhriatpawh tawn hian India ram inpawh leh nghet kan siam thei a, hetiang programme buatsaih hi ram chak zawk leh inpumkhat siamna atan thil pawimawh tak a ni,” a ti.
Bihar larsap Arif Mohammed Khan leh Odisha larsap Dr Hari Babu Kambhampati thuchah bakah state pahthum chanchin video tawi thlirho a ni a. Rajasthan state aiawhin MZU assistant professor Dr Akhilesh Kumar Sharma leh Odisha aiawhin MZU Sociology Department HoD Prof. Rabindra Kumar Mohanty ten state chanchin an sawi a. MZU, NIT Mizoram leh Govt. J Thankima College zirlaiten lemchan, hnam lam leh zai an entir a ni.
1912 March 22 khan Bengal Presidency atangin Bihar a lo piang a. Hmanlai zirna hmun pawimawh – Nalanda University bakah Bodh Gaya leh hmun pawimawh tak tak awmna state a ni. Rajasthan hi 1949 March 30 khan Jodhpur, Jaipur, Bikaner leh Jaisalmer lal ram inzawmkhawm chuan siamin ‘Greater Rajasthan’ tia vuah a ni. History ropui tak tak neiin Pink City Jaipur leh khawpui pawimawh tak tak awmna a ni. Odisha hi tunhma chuan Bihar hnuaiah awmin, 1936 April 1 khan state puitlinga hlankai a ni a, tawng hman behchhana India rama state piang hmasa ber a ni. Kalinga lal ram awmna leh temple 600 chuang awmna niin, ‘Temple State’ tia vuah a ni.
Ek Bharat Shreshtha Bharat programme hian India rama state leh union territory-a cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh an inkara inhriatthiam tawnna nasa zawk siam a tum a. He programme kaltlang hian India rama state leh UT din champha lawmna hi Mizoram larsap kaihhruaiin Raj Bhavan-ah June 2023 atanga buatsaih a ni.