Tlangmite “Separate Administration”

Manipur sawrkarin a khua leh tuite zinga tlangmite nekchepa hnawhchhuah tuma dan a siamchawp tlawhchhana hma a lakna kal zel chuan tualthihna, thisen chhuahna, in leh lo bakah sakhaw biak in tam tak hal chhiatna, thlabarna leh raltlanna a thlen chho mek a.
State pakhat chhunga hetiang thil rapthlak tak a thleng thei hi, Manipur sawrkar, state sawrkar pakhat ve ruang chuan a duh phawt chuan a dang thei tih a lang a; dan ahnehin sawrkar mi leh sate pawhin firfiakte chetna hi an puibawm hiala sawi a ni zawk a. Hetih rual hian, Prime Minister ber pawh, heti khawpa state pakhat chhunga tualchhung buaina bengkhawn tha duh vak lo nia ngaih theiha thu leh hla a rawn nei chau em em maite leh, state mipuite hruaitu lu ber chief minister ber pawhin thihna hial thlenna intualvuakna leh sakhaw biak in tam tak inhalchhiatsakna thleng mek a thlir liam mai mai theia ngaih theia a awmte hi, an demawm a tih loh theih loh.
Hetiang boruak hnuaiah tawh hi chuan, Non-Naga tribal MLA sawm rualten “Separate Administration” an ngiat thu an auchhuahpui ta hi a awm hliah hliah niin a lang. A chhan pawh, kum riat vel kaltaa “The Protection of Manipur People’s Bill, 2015” leh “The Manipur Land Revenue and Land Reform (amendment) Bill 2015”, House chhunga sawihona pawh awm mumal lova passed tak mai tlawhchhana hmalakna kal zel kha tuna thil thleng mek hi a ni, a tih theih ang a. Tuna buaina thleng hi Central mi leh sate rawn inrawlh tak avanga ziaawm leh ta deuh chauh a ni a. Hun a lo kal zel ang a, tun ang buaina emaw, a aia nasa daih emaw hi la rawn irhchhuak leh tho tura ngaih a ni awm e.
Hei vang hian, Separate Administration ngiat mai loh chu tlangmite tan hian tih theih dang a awm lo niin a lang ta. Hetiang thilah hian mipui (tlangmite) rawnna (political consultation) te pawh kalpui a ngai ang a, eng thutlukna pawh lo awm se, ram inchuh avanga buaina hi chu pumpelhna tur a awm tawh dawn lo niin a lang.