Turkey leh Syria-a lirnghing avanga nunna chan mi 28,000 chuang an awm tawh a, nung dama la awm te chhanchhuah beiseina a chau tawh hle thung.
-- Advertisement --
Kar kalta Inrinni khan German rescuer leh Austrian army te search operation nei te chuan ralthuam keng si lova intibuai pawl an awm avangin chhanchhuah hna an thawk chhunzawm thei lo va.
Food supply a tlem zel avangin security lamah harsatna nasa zawk a awm zui dawn tiin rescuer pakhat chuan a sawi a. Mi 50 chuang chu rukruk avanga man an ni tawh a, silai thahnem tak man a ni tawh bawk.
Turkey president chuan dan bawhchhiate lakah emergency power hmana hrem an nih tur thu a puang zui nghal bawk.
Austrian army thupuangtu chuan Hatay province a intihbuaina thleng avangin Austrian Forces Disaster Relief Unit te chuan hnathawk thei lovin base camp ah international organisation dang te nen an tawm ringawt tiin a sawi.
“Turkey a pawl leh pawl inkarah inbakkaihna nasa tak a thleng mek” tiin Lieutenant Colonel Pierre Kugelweis chuan thuchhuah siamin a sawi a, “Nunna chhanhim tih lam leh himna an ngaihtuah vak lo,” tihialin a sawi.
Austria sipai tena chhanchhuah hna an kalpui an tihtawp lailawk loh theih loh hnuah Turkish army te chu inrawlh zui nghalin venhimna hnuaiah chhanchhuah hna kalpui chhunzawm leh a ni.
German lam atanga search and rescue group ISAR leh Federal Agency for Technical Relief (TSW te pawhin security chhuan lamin chhanchhuah hna an chhunzawm lo bawk a.
“Turkey-a pawl hrang hrang inkarah inbeihna a nasa tial tial a, silai hial hmeh puah a ni” tiin ISAR thupuangu Stefan heine chuan a sawi.
Steven Bayer, operations manager Isar chuan eitur, tui thianghlim a van tial tial avangin security lamah harsatna a nasa tial tial dawn tiin a sawi a. “Security dinhmun fimkhur takin kan thlithlai reng a ni” tiin a sawi.
German rescue team te chuan Turksih thuneitu tena security dinhmun a tha e an tih veleh chhanchhuah hna an chhunzawm tur thu an sawi bawk.
Lirnghing avanga Turkey bika nunna chan mi 24,617 chhinchhiah an nih tawh thu Vice President of Turkey Fuat Oktay chuan a sawi a.
Hetih lai hian President Recep tayyip Erdogan chuan Hatay a buaina chhuak chungchangah thuneitute chuan hremna an lekkawh tur thu a sawi a.
“Emergency kan puang nghal a, tun atang chuan rukruk ching leh midangte rukbo chingte chuan sorkarin a thlithlai reng tih an hriat a ngai ang,” tiin a sawi.
Mi 48 chuang rukruk avanga manin an awm tawh a, silai thahnem tak, pawisa fai mai bakah, jewellery leh bank card te mansak an ni.
Lirnghing avangin Turkey bikah building tlusawp 6,000 chuang awma ngaih a ni a, he chhiatrupna turu tak hi President Recep Tayyip Erdogan sorkar hmai tibaltu ni zui zel thei tura ngaih a ni.
Inthlanpui hmachhawn mai tur niin Erdoigan-an Turkey-a kum 20 zet thuneihna a lekkawh tawhna chu derthawngah a siam belh phah tia sawi a ni bawk.
He lirnghing hi United Nations aid chief chuan ‘helai region a kum 100 chhunga chhiatna rapthlak ber’ tiin a sawi a.
“Ka hriat theih china natural disaster rapthlak ber a la ni,” tiin Martin Griffiths chuan a sawi.
“Chutih rualin khawvel anga tanpuina luhchakna ber niin ram za chuang atangin tanpuina lut nghalin ngaihsakna nasa tak lantir a ni,” tiin a sawi bawk.
Griffith chuan politics dahthaa tanpuina leh chhawmdawlna dah pawimawh hmasak ngenin hei vang hian kar kalta Inrinni khan kum 35 lai khara awm tawh Armenia leh Turkey inkalpawhna kawngpui chu hawnin a awm zui bawk.
Syria sorkar pawhin opposition group te thunun rama UN aid team te an luh a phalsak bawk a. Kum 2011 atang khan heng opposition te awmna area-ah hian tute mah tanpuina pek pawh Syria sorkarin a remti ngai lo a ni.