Zirlai pawl-ten inthahna dem

Mizo Zirlai Pawl leh Mizo Students’ Union chuan havilder Bimal Kanti Chakma-in a thawhpui police pahnih a kaphlum chu an dem tih an sawi.
MZP Gen. Hqrs. thuchhuak chuan ramri venghim tura duty Hav. Bimal Kanti Chakma-in a thawhpui Hav. J. Lalrohlua leh Hav. Indra Kumar Rai te a kaphlum chu a hrethiam lo hle tih sawiin, tualthattu hi a hna atanga ban nghal turin thuneitute a phut tih a sawi a. He thil thleng an hriat veleh MZP Hqrs Kolasib leh a hnuaia Sub Hqrs hrang hrang hruaituten a hmun pan nghalin, Hav. J. Lalrohlua ruang chungah pawl aiawhin pangpar an dah a, puanin an tuam tih a sawi a ni.
MSU Gen. Hqrs thuchhuak chuan Hav. Bimal Kanti Chakma chetdan chu a dem takzet tih sawiin, ram leh hnam himna atana mawhphurna sang tak nei chunga duty laia zu a rui leh hetianga a duty puite rawng taka an nunna a laksak chu pawikhawihna nasa takah a ngai tih a sawi. Pawikhawihtu chu a banna order tichhuak ngei turin sawrkar an phut tih sawiin, Mizoram himna tura duty Hav. J Lalrohlua leh Indra kumar Rai ten nunna an chan chu pawi a tih thu a sawi a ni.