Meta CEO Mark Zuckerberg-a’n Mar-a-Lago ah Trump zanriah kilpui

Meta CEO Mark Zuckerberg-a’n Mar-a-Lago ah Trump zanriah kilpui
US President hlui leh President-elect ni mek Donald Trump leh Meta CEO Mark Zuckerberg te chuan Florida-a Trump-a private club Mar-a-Lago-ah zanriah an eiho a, he meeting hian Facebook founder leh Republican politician te inkarah boruak a tha leh tawh tih a lantir niin a ngaih theih.
Trump-a sorkar thar huan US dinhmun chawisan lehna tur kawng hrang hrang an ruahhman te sawiho hun an buatsaihah hian sumdawng lian tak tak an sawm khawm a, chung zingah chuan Zuckerberg pawh hi a langsar pawl a ni. Trump-a’n a sorkar tum hnihnaa deputy chief of staff tura a ruat Stephen Miller chuan he zanriah eihonaa Zuckerberg a tel ve hian an ram tana Trump-a hmathlir chu a support ni a a lan thu a sawi.
Miller chuan, “Mark hian tuipui zawng, company leh agenda a nei a. Mahse, Trump hruaina hnuaia America tundin tharleh hi a support tih a lantir chiang a ni,” a ti.
Meta thupuangtu pawhin Zuckerberg hi president-elect meeting neih pui tura sawm a nih thu puangin, sorkar tharin a hawi lam tur an hmathlir te an sawiho niin a tarlang ve bawk.
Trump leh Zuckerberg te inkarah hian boruak tha vak lo a awm ve reng tawh a, January ni 6, 2021 a Trump-a tantu ten Capitol an beih hnu lawkah Facebook chuan Trump hi an blacklist a, a Facebook account pawh an paih sak reng a, mahse, 2023 kumtir lam khan Trump-a Facebook hi an tihnun sak leh ta a ni.
Zuckerberg hian 2024 US President inthlan boruakah khan a tan lam a tilang ve lem lo a, tute campaign fund-ah mah sum a thawh lo va, a hawi lam pawh a puang chuang lo. Mahse, Trump-a thah tuma an beih hnuah Zuckerberg hian khata tanga Trump rawn dinchhuah leh dan chu a lo fak zauh tawh thung.
Trump tana mi pawimawh tak chu Elon Musk a ni a, khawvela pahausa ber hian thil a titheiin, Trump tan pawh kawng tam takin a hawn sak bawkah Trump-a politic zin kawnga President a nih leh theih nana thawh hlawk ber te zinga mi niin, Trump-a campaign nan hian dollar maktaduai 200 vel a thawh niin report a awm a, Mar-a-Lago ah pawh tunlai chu Elon hi a lut chhuak ve deuh reng a ni, Elon-a huhang hian sumdawng lian tak tak chu Trump lamah a hawi tir deuh dual niin an ngai a ni. Elon Musk hi Trump-a’n department a dinthar tur, sorkar sum a lo thlawna luang ral tihtlemna kawnga hma latu tur Department of Government Efficiency (DOGE an tih mai)ah pawh Vivek Ramaswamy nen a hotu an ni dawn a, DOGE hi Trump-a sorkarah department pawimawh leh thil tithei tak a ni dawn a ni.